महानगरपालिकाको विपद् व्यवस्थापन समितिको बैठकले बाढी प्रभावित क्षेत्रमा राहत तथा उद्धारका लागि आवश्यक समन्वय र स्वास्थ्य सेवा उपलब्ध गराउने निर्णय गरेको हो। कार्यवाहक प्रमुख सुनिता डंगोलको अध्यक्षतामा बसेको बैठकले प्रतिकार्य सञ्चालन, समन्वय तथा सहजीकरणको जिम्मेवारी समितिका सदस्यसचिव एवं विपद् व्यवस्थापन विभागका प्रमुख अनिरुद्र नेपाललाई दिएको छ।

बैठकले महानगरपालिकाअन्तर्गत कार्यरत चिकित्सक तथा स्वास्थ्यकर्मीलाई आवश्यकताअनुसार परिचालन गर्ने निर्णयसमेत गरेको छ। घाइते तथा बिरामीका लागि आवश्यक औषधि उपलब्ध गराउने महानगरले जनाएको छ।

६ एम्बुलेन्स तयारीमा

महानगरपालिकाले बाढी प्रभावित क्षेत्रका लागि चारवटा एम्बुलेन्स नुवाकोटतर्फ पठाइसकेको जनाएको छ। थप दुईवटा एम्बुलेन्स त्रिभुवन अन्तर्राष्ट्रिय विमानस्थलमा तयारी अवस्थामा राखिएको छ।

यस्तै, आपत्कालीन सञ्चालन केन्द्रमा उपलब्ध विपद् व्यवस्थापन सामग्री आवश्यकता अनुसार प्रभावित क्षेत्रमा पठाउने निर्णय गरिएको छ। उपलब्ध सामग्री तथा औषधि अपुग भए विपद् व्यवस्थापन कोषबाट खरिद गरी तत्काल उपलब्ध गराउने निर्णयसमेत बैठकले गरेको छ।