चितवन । रसुवाको भोटेकोशी नदीमा आएको विनाशकारी बाढीपछि त्रिशूली र नारायणी नदी किनारमा हालसम्म ६४ वटा शव फेला परेका छन्। फेला परेकामध्ये केही शव पूर्ण अवस्थामा रहेका छन् भने केही मानव शरीरका अंग मात्र भेटिएको प्रहरीले जनाएको छ।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार नदी किनारबाट फेला पारिएका शवहरू भरतपुर अस्पतालको शवगृहमा राखिएको छ। तर, शवको संख्या बढ्दै जाँदा अस्पतालको शवगृहमा पर्याप्त स्थान अभाव भएको छ।

तनहुँ जिल्लामा फेला परेका नौवटा शवसमेत व्यवस्थापनका लागि चितवन ल्याइएको थियो। तर भरतपुर अस्पतालको शवगृहमा स्थान अभाव भएपछि ती शव पुनः तनहुँ नै फिर्ता पठाइएको प्रहरीले जनाएको छ।

शव खोजी कार्य जारी

भोटेकोशी हुँदै त्रिशूली र नारायणी नदी प्रणालीमा बगेर आएका बेपत्ता व्यक्तिको खोजीका लागि नेपाल प्रहरी, सशस्त्र प्रहरी बल र नेपाली सेना निरन्तर परिचालित रहेका छन्।

तीनवटै सुरक्षा निकायले नदी किनार तथा आसपासका क्षेत्रमा शव र बेपत्ता व्यक्तिको खोजी कार्यलाई निरन्तरता दिएका छन्। बाढीबाट ठूलो संख्यामा मानिस बेपत्ता भएकाले नदीको तल्लो तटीय क्षेत्रमा पनि खोजी कार्य विस्तार गरिएको छ।

शव व्यवस्थापनका लागि वैकल्पिक स्थानको तयारी

भरतपुर अस्पतालको शवगृहमा शव अटाउन नसक्ने अवस्था आएपछि थप फेला पर्ने शवको व्यवस्थापनका लागि वैकल्पिक स्थानको खोजी थालिएको छ।

प्रहरीका अनुसार अब फेला पर्ने शवलाई व्यवस्थित रूपमा राख्न औद्योगिक क्षेत्रभित्र रहेको एक औद्योगिक प्रतिष्ठानको कार्यालय प्रयोग गर्ने तयारी गरिएको छ। शवको पहिचान, व्यवस्थापन तथा आवश्यक कानुनी प्रक्रिया सहज बनाउन सम्बन्धित निकायसँग समन्वय भइरहेको प्रहरीले जनाएको छ।

Originally published on abcnews.com.np.