काठमाडौं । रसुवाको भोटेकोसी नदीमा आएको विनाशकारी बाढीपछि उद्धार तथा राहत कार्यमा खटिएका प्रहरीमध्ये २८ जना अझै सम्पर्कविहीनरहेका छन्। प्रहरी प्रधान कार्यालयका अनुसार रसुवा जिल्लाका विभिन्न स्थानमा खटिएका प्रहरीको अवस्थाबारे खोजी तथा सम्पर्क प्रयास तीव्र पारिएको छ।

प्रहरी प्रधान कार्यालयले दिएको जानकारीअनुसार रसुवामा खटिएका प्रहरीमध्ये ३२ जनासँग सम्पर्क स्थापित भएको छ। तर बाढीले सडक, पुल तथा सञ्चार संरचनामा क्षति पुर्‍याएपछि केही प्रहरीसँग सम्पर्क हुन नसकेको बताइएको छ।

भोटेकोसी नदीमा आएको बाढीपछि उत्पन्न विपत्तिमा उद्धार, खोज तथा राहत कार्यका लागि देशभरबाट ३ हजार ३१८ जना प्रहरी परिचालन गरिएको प्रहरीले जनाएको छ। प्रभावित क्षेत्रका बस्तीमा फसेका नागरिकको उद्धार, बेपत्ताको खोजी, शव व्यवस्थापन तथा राहत वितरणमा प्रहरी सक्रिय रहेको छ।

उद्धारमा चुनौती

बाढीले रसुवा तथा आसपासका जिल्लाका सडक र पुलमा ठूलो क्षति पुर्‍याएकाले प्रभावित क्षेत्रमा पुग्न तथा उद्धार कार्य सञ्चालन गर्न कठिनाइ भइरहेको छ। सञ्चार सम्पर्कसमेत प्रभावित भएकाले सम्पर्कविहीन प्रहरीको अवस्थाबारे यथाशीघ्र जानकारी लिने प्रयास भइरहेको प्रहरी प्रधान कार्यालयले जनाएको छ।

प्रहरीका साथै नेपाली सेना, सशस्त्र प्रहरी बल र अन्य उद्धार टोलीहरू पनि प्रभावित क्षेत्रमा परिचालन भएका छन्। सम्पर्कविहीन प्रहरीको खोजी तथा उद्धारलाई प्राथमिकतामा राखिएको जनाइएको छ।

Originally published on abcnews.com.np.