चितवन । कृषि तथा वन विज्ञान विश्वविद्यालय, रामपुरले पूर्वनिर्धारित सम्पूर्ण परीक्षा स्थगित गरेको छ। शिक्षा तथा खेलकुद मन्त्रालयको सूचना तथा देशमा उत्पन्न प्राकृतिक विपत्तिका कारण सिर्जित प्रतिकूल परिस्थितिलाई ध्यानमा राख्दै विश्वविद्यालयले परीक्षा स्थगित गर्ने निर्णय गरेको हो।

विश्वविद्यालयका रजिस्ट्रार प्रा. डा. सुवीर सिंहद्वारा जारी सूचनाअनुसार भदौ ११ गतेदेखि सञ्चालन हुने भनिएका सम्पूर्ण परीक्षा तत्कालका लागि स्थगित गरिएका छन्।

विश्वविद्यालयले स्थगित परीक्षाको नयाँ तालिका यथाशीघ्र सार्वजनिक गरिने जनाएको छ।

प्राकृतिक विपत्तिका कारण निर्णय

भदौ १० गते देशका विभिन्न भागमा आएको विनाशकारी बाढी तथा पहिरोका कारण ठूलो मानवीय तथा भौतिक क्षति भएपछि सिर्जित परिस्थितिलाई मध्यनजर गर्दै परीक्षा स्थगित गरिएको विश्वविद्यालयले जनाएको छ।

विश्वविद्यालय परिवारले प्राकृतिक विपत्तिमा परी ज्यान गुमाएकाप्रति श्रद्धाञ्जली व्यक्त गर्दै प्रभावित परिवारप्रति गहिरो दुःखसमेत व्यक्त गरेको छ।

शिक्षा तथा खेलकुद मन्त्रालयबाट प्राप्त सूचनालाई समेत आधार बनाउँदै हालको प्रतिकूल परिस्थितिमा परीक्षा सञ्चालन गर्न कठिनाइ हुने निष्कर्षसहित सम्पूर्ण पूर्वनिर्धारित परीक्षा तत्कालका लागि स्थगित गरिएको विश्वविद्यालयले जनाएको छ।

Originally published on abcnews.com.np.