काठमाडौं । रसुवास्थित भोटेकोसी नदीमा आएको भीषण बाढीपछि पत्रकार टेकराज थामी र पत्रकार निराजन पौडेलका परिवारका पाँच सदस्य सम्पर्कविहीन भएपछि नेपाल पत्रकार महासंघले उनीहरूको खोजी कार्यलाई तीव्रता दिन सरकार तथा सम्बन्धित निकायसमक्ष आग्रह गरेको छ।

बिहीबार, भदौ ११ गते जारी प्रेस विज्ञप्तिमार्फत महासंघले सम्पर्कविहीन व्यक्तिहरूको खोजी तथा उद्धारका लागि तत्काल आवश्यक पहल गर्न जोडदार माग गरेको हो।

नेपाल पत्रकार महासंघका पूर्वकेन्द्रीय सदस्य तथा नयाँ पत्रिका दैनिकका पत्रकार टेकराज थामी केरुङबाट सम्पर्कविहीन भएको जानकारी परिवारबाट प्राप्त भएको महासंघले जनाएको छ। महासंघका महासचिव रामप्रसाद दाहालद्वारा जारी विज्ञप्तिअनुसार थामी समाचार संकलनका लागि केरुङ हुँदै तिब्बततर्फ गएका थिए।

यस्तै, नुवाकोटको विदुर नगरपालिका–७ निवासी पत्रकार निराजन पौडेलका परिवारका पाँच सदस्य पनि बाढीपछि सम्पर्कविहीन भएको जानकारी महासंघलाई प्राप्त भएको छ। पौडेलका बुबा, आमा, काका, काकी र बहिनी सम्पर्कविहीन रहेको विज्ञप्तिमा उल्लेख गरिएको छ।

महासंघले सम्बन्धित सरकारी तथा उद्धार निकायलाई तत्काल आवश्यक पहल गरी सम्पर्कविहीन व्यक्तिहरूको खोजी कार्यलाई प्रभावकारी र तीव्र बनाउन आग्रह गरेको छ।

विद्युत् र सञ्चार सेवा सुचारु गर्न पनि माग

बाढी प्रभावित क्षेत्रमा विद्युत् आपूर्ति बन्द हुँदा सञ्चार सेवा अवरुद्ध भएको र त्यसको असर सञ्चारमाध्यम सञ्चालन तथा सूचना प्रवाहमा समेत परेको महासंघले जनाएको छ।

महासंघले प्रभावित क्षेत्रमा विद्युत् आपूर्ति यथाशीघ्र सुचारु गर्न तथा सञ्चार सेवा नियमित सञ्चालनका लागि आवश्यक व्यवस्था मिलाउन सरकार र सम्बद्ध निकायसँग आग्रह गरेको छ। सञ्चार सेवा तत्काल सञ्चालनमा आउन नसक्ने स्थानमा वैकल्पिक सञ्चार व्यवस्थाको प्रबन्ध गर्न पनि महासंघले अपिल गरेको छ।

विपद्को समयमा सही र समयमै सूचना प्रवाह हुनु महत्वपूर्ण भएकाले सञ्चार सेवा सञ्चालनलाई प्राथमिकतामा राख्नुपर्ने महासंघको जोड छ।

Originally published on abcnews.com.np.