काठमाडौं । कृषि, वन तथा पर्यावरण मन्त्रालयले विपद् प्रभावित क्षेत्रमा घाइते पशुपन्छीको उद्धार, आकस्मिक उपचार, मृत पशुपन्छीको सुरक्षित व्यवस्थापन तथा जैविक सुरक्षाका लागि औषधिसहितको प्राविधिक टोली परिचालन गरेको छ।

भोटेकोसी नदीमा आएको विनाशकारी बाढीबाट प्रभावित रसुवा, नुवाकोट र धादिङलगायत जिल्लाका नदी तटीय क्षेत्रमा कृषि, वन तथा पर्यावरणमन्त्री गीता चौधरीको निर्देशनमा प्राविधिक टोली परिचालन गरिएको मन्त्रालयले जनाएको छ।

टोलीले बाढी प्रभावित क्षेत्रमा रहेका घाइते तथा जोखिममा परेका पशुपन्छीको उद्धार र उपचार गर्नुका साथै मृत पशुपन्छीको सुरक्षित व्यवस्थापनमा समेत काम गर्नेछ। विपद्पछि फैलिन सक्ने रोग तथा अन्य जैविक जोखिम नियन्त्रणका लागि आवश्यक औषधि र प्राविधिक सहयोग पनि उपलब्ध गराइने जनाइएको छ।

विभिन्न निकायसँग सहकार्यको अपिल

यसैबीच, पशु सेवा विभागले विपद्को समयमा उद्धार तथा उपचार कार्यलाई प्रभावकारी बनाउन सम्बन्धित सरकारी तथा गैरसरकारी निकाय, पेसागत संघसंस्था, उद्यमी तथा व्यवसायी, पशु कल्याणसम्बन्धी संस्था, निजी पशु सेवाकर्मी तथा नागरिक समाजसँग सहकार्य गर्न आह्वान गरेको छ।

विभागले प्रभावित क्षेत्रमा रहेका पशुधन तथा पशुपन्छीको संरक्षण, उपचार र व्यवस्थापनका लागि सबै सरोकारवाला पक्षलाई आवश्यक सहयोग र समन्वय गर्न आग्रह गरेको हो।

विपद्बाट प्रभावित क्षेत्रमा पशुधनको उद्धार र उपचारसँगै रोगको सम्भावित जोखिम न्यूनीकरण तथा जैविक सुरक्षालाई समेत प्राथमिकतामा राखेर प्राविधिक टोली परिचालन गरिएको मन्त्रालयले जनाएको छ।

Originally published on abcnews.com.np.