ललितपुर । बुङ्गमती क्षेत्रका किसान व्यावसायिक टनेल खेतीतर्फ आकर्षित भएका छन्। पछिल्लो समय किसानले आधुनिक प्रविधिको प्रयोग गर्दै टनेलभित्र विभिन्न जातका तरकारी उत्पादन गर्न थालेका हुन्।

टनेल खेतीले प्रतिकूल मौसमबाट बाली जोगाउनुका साथै उत्पादन र गुणस्तर बढाउन सहयोग गर्ने किसानको अनुभव छ। बुङ्गमतीका किसानले टमाटर, काउली, बन्दा लगायतका विभिन्न तरकारी टनेलमा उत्पादन गरिरहेका छन्।

किसान घनश्याम श्रेष्ठका अनुसार टनेल निर्माण र खेतीका लागि सुरुवाती लगानी केही बढी आवश्यक भए पनि त्यसबाट प्राप्त हुने प्रतिफल राम्रो छ। टनेल खेतीबाट उत्पादनमा वृद्धि हुनुका साथै तरकारीको गुणस्तरसमेत सुधार हुने उनको भनाइ छ।

‘टनेलमा खेती गर्न सुरुमा लगानी केही बढी गर्नुपर्छ। तर उत्पादन राम्रो हुने भएकाले त्यसको प्रतिफल पनि राम्रो हुन्छ,’ श्रेष्ठले भने।

उत्पादनसँगै आम्दानी बढ्ने अपेक्षा

टनेल खेतीबाट किसानले वर्षेनी उल्लेख्य आम्दानी गर्दै आएका छन्। यस वर्ष पनि उत्पादन राम्रो हुने अपेक्षा उनीहरूको छ। बजारमा तरकारीको माग बढ्दै गएकाले टनेलमा उत्पादित तरकारीले राम्रो मूल्य पाउने किसानको विश्वास छ।

बुङ्गमती क्षेत्रका किसानले उत्पादन गरेका तरकारी स्थानीय बजारसँगै काठमाडौं उपत्यकाका विभिन्न थोक बजारमा बिक्री गर्दै आएका छन्। बजारसम्म सहज पहुँच भएकाले उत्पादित तरकारी बिक्रीमा समस्या कम भएको किसान बताउँछन्।

परम्परागत खेती प्रणालीको तुलनामा टनेल खेतीबाट उत्पादन बढाउनुका साथै मौसमजन्य जोखिम घटाउन सकिने भएकाले पछिल्लो समय यसप्रति किसानको आकर्षण बढ्दै गएको छ। आधुनिक कृषि प्रविधिको विस्तारसँगै बुङ्गमतीका किसानले व्यावसायिक तरकारी खेतीलाई थप विस्तार गर्ने अपेक्षा गरेका छन्।

Originally published on abcnews.com.np.