महोत्तरी, । रसुवामा आएको विनाशकारी बाढीपछि महोत्तरी जिल्लाका ११ जना व्यक्तिसँग सम्पर्क हुन नसकेको छ।

महोत्तरीका प्रमुख जिल्ला अधिकारी इन्द्रदेव यादवका अनुसार बुधबार आएको भीषण बाढीपछि रसुवामा कार्यरत तथा विभिन्न प्रयोजनले त्यहाँ पुगेका महोत्तरीका ११ जना सम्पर्कविहीन भएका हुन्।

सम्पर्कविहीन हुनेहरूमा बर्दिबास नगरपालिका–३ का इन्जिनियर सौभाग्य विष्ट, बर्दिबास नगरपालिका–९ की जोया राना मगर, गौशाला नगरपालिका–१ का विजय थापा मगर, पिपरा गाउँपालिका–३ का इन्जिनियर विकास यादव तथा औरही नगरपालिका–३ का सचिनकुमार यादव रहेका छन्।

त्यस्तै, जलेश्वर नगरपालिका–१० का सुशीललाल दास, जलेश्वर नगरपालिका–९ का राकेशकुमार यादव, लोहरपट्टी नगरपालिका–७ का युवराज पाण्डे, गौशाला नगरपालिका–८ का शीतल लुङ्गेली, उनकी श्रीमती सरिता लुङ्गेली तथा छोरा साइमन लुङ्गेली पनि सम्पर्कविहीनको सूचीमा रहेका छन्।

स्थानीय प्रशासनका अनुसार सम्पर्कविहीन भएकामध्ये केही रसुवामा कार्यरत थिए भने केही घुम्न तथा अन्य व्यक्तिगत प्रयोजनका लागि रसुवा पुगेका थिए।

खोजी तथा उद्धारको प्रयास जारी

रसुवाको भोटेकोशी क्षेत्रमा आएको विनाशकारी बाढीपछि विभिन्न जिल्लाका नागरिकसँग सम्पर्क विच्छेद भएको छ। बाढी प्रभावित क्षेत्रमा सञ्चार, सडक तथा यातायात सम्पर्कमा समस्या उत्पन्न भएकाले धेरै व्यक्तिको अवस्थाबारे यकिन विवरण आउन बाँकी रहेको जनाइएको छ।

स्थानीय प्रशासनले सम्पर्कविहीन व्यक्तिहरूको विवरण संकलन गर्दै सम्बन्धित निकायसँग समन्वय गरी उनीहरूको खोजी तथा उद्धारका लागि पहल भइरहेको जनाएको छ।

Originally published on abcnews.com.np.