काठमाडौँ । शुक्रबारदेखि देशव्यापी प्रदर्शनमा आउन लागेको नेपाली फिल्म ‘पार्वती’ को प्रदर्शनको पहिलो दिन हुने सम्पूर्ण आम्दानी भोटेकोशी बाढीबाट प्रभावित नागरिकका लागि प्रदान गरिने भएको छ।

फिल्मकी निर्मात्री तथा निर्देशक नीता ढुंगानाले पहिलो दिनको बक्स अफिस आम्दानी प्रधानमन्त्री दैवी प्रकोप उद्धार कोषमा जम्मा गर्ने निर्णय गरिएको जानकारी दिएकी छन्।

ढुंगानाले यसअघि बिहीबार बिहान व्यक्तिगत रूपमा पनि प्रधानमन्त्री दैवी प्रकोप उद्धार कोषमा एक लाख रुपैयाँ सहयोग गरिसकेकी छन्।

‘कर्मले पनि केही गर्नुपर्‍यो भनेर पहिलो दिन जति कलेक्सन हुन्छ, त्यति रकम सबै प्रधानमन्त्री दैवी प्रकोप उद्धार कोषमा जम्मा गर्दैछौँ,’ उनले बताएकी छन्।

उनका अनुसार फिल्म केवल आर्थिक लाभका लागि मात्र निर्माण गरिएको नभई सामाजिक उत्तरदायित्वलाई समेत ध्यानमा राखेर बाढीपीडितका लागि सहयोग गर्ने निर्णय गरिएको हो।

‘हामीले यो फिल्म पैसा कमाउनका लागि मात्र बनाएको होइनौँ,’ उनले भनिन्, ‘मेरो फिल्मको पहिलो दिनको बक्स अफिस कलेक्सन कोषमा दिऊँ भन्ने सोचेर यो निर्णय गरेका हौँ।’

प्रभावित क्षेत्रमा पुगेर राहत वितरण गर्ने योजना

नीता ढुंगानाले सम्भव भए बाढी प्रभावित क्षेत्रमा प्रत्यक्ष पुगेर राहत वितरण गर्ने योजना पनि रहेको बताएकी छन्।

सामाजिक कथावस्तुमा आधारित फिल्म ‘पार्वती’ मा ढुंगानाले मुख्य भूमिका निर्वाह गरेकी छन्। फिल्ममा उनले अटिजम भएकी एक पात्रको भूमिका निभाएकी छन्।

रसुवाको भोटेकोशी क्षेत्रमा आएको विनाशकारी बाढीबाट ठूलो मानवीय तथा भौतिक क्षति भएको छ। बाढीका कारण धेरैको मृत्यु भएको छ भने ठूलो संख्यामा मानिस अझै सम्पर्कविहीन छन्। हजारौँ नागरिक विस्थापित तथा घरबारविहीन भएका छन्।

Originally published on abcnews.com.np.