धनगढी । नेकपा (एमाले) सुदूरपश्चिम प्रदेश कमिटीको १२औँ बैठकले बाढीपहिरो प्रभावितका लागि एक लाख रुपैयाँ सहयोग उपलब्ध गराउने निर्णय गरेको छ । प्रदेश कमिटी अध्यक्ष कृष्णप्रसाद जैशीको अध्यक्षता तथा केन्द्रीय कमिटी उपमहासचिव लेखराज भट्टको प्रमुख आतिथ्यमा धनगढीमा बसेको बैठकले रसुवा, नुवाकोट, धादिङ, तनहुँ, गोरखा र चितवनमा भएको जनधनको क्षतिप्रति दुःख व्यक्त गर्दै मृतकप्रति श्रद्धाञ्जली र पीडित परिवारप्रति समवेदना प्रकट गरेको हो ।

बैठकले प्रभावितको उद्धार तथा राहतका लागि प्रदेश कमिटीबाट एक लाख रुपैयाँ उपलब्ध गराउने निर्णय गरेको प्रदेश उपसचिव तथा प्रचार तथा प्रकाशन विभाग प्रमुख भागरथी विष्टले जारी गरेको विज्ञप्तिमा उल्लेख छ । बाढीपहिरो प्रभावितको पुनर्निर्माण, पुनःस्थापना तथा मृतकका परिवार र घाइतेको उपचारका लागि आवश्यक बजेट व्यवस्था गर्न सरकारसँग मागसमेत गरिएको छ । बैठकले ‘मिसन पार्टी जागरण’ अभियानलाई प्रभावकारी बनाउँदै पालिका तहसम्म विस्तार गर्ने निर्णय गरेको छ । असोज १५ गतेसम्म जिल्ला कमिटीको बैठक बसेर कार्ययोजना निर्माण गर्ने तथा अवधि पुगेका जनसंगठनका अधिवेशन तथा सम्मेलन मंसिर मसान्तसम्म सम्पन्न गर्ने निर्णय गरिएको छ ।- त्यस्तै, बाँकी जिल्लामा पार्टी स्कुल सञ्चालन गर्ने जिम्मेवारी प्रचार तथा प्रकाशन विभागलाई दिइएको छ ।

एमाले प्रदेश कमिटीले किसानलाई समयमै मल, बीउ तथा कृषि सामग्री उपलब्ध गराउन सरकारको ध्यानाकर्षण गराएको छ । चाडपर्वका समयमा अत्यावश्यक वस्तुको आपूर्ति सहज बनाउन र बजार व्यवस्थापन प्रभावकारी बनाउन पनि माग गरिएको छ ।बैठकले कालापानी, सुस्ता लगायतका सीमा क्षेत्रमा भइरहेको विदेशी हस्तक्षेपप्रति ध्यानाकर्षण जनाउँदै दार्चुलाको टिंकर र छाङरुलाई नेपालतर्फबाट सडक सञ्जालमा जोड्ने काम अघि बढाउन सरकारसँग माग गरेको छ ।सुदूरपश्चिमको नवगठित प्रदेश सरकारलाई बधाई दिँदै नीति तथा कार्यक्रम र बजेट जनमुखी बनाउन आग्रह गरिएको छ । गोदावरीमा प्रदेश राजधानी निर्माणका लागि आवश्यक बजेट विनियोजन गरी काम अघि बढाउन तथा स्वास्थ्य बिमा सेवा प्रभावकारी बनाउन पनि सरकारसँग माग गरिएको छ । बैठकमा प्रमुख अतिथि लेखराज भट्टले गणतन्त्रको रक्षाका लागि सम्पूर्ण वामपन्थी शक्ति एकताबद्ध भएर अघि बढ्नुपर्ने बताएका थिए । उनले पार्टी जागरण अभियानलाई प्रभावकारी बनाउन र पार्टीभित्र आवश्यक आत्मसमीक्षा गर्दै एकताबद्ध भएर अघि बढ्नुपर्नेमा जोड दिएका थिए ।

Originally published on abcnews.com.np.