काठमाडौँ । चीनको तिब्बततर्फबाट रसुवाको भोटेकोसी नदीमा शुक्रबार दिउँसो पानीको सतह पुनः उल्लेख्य रूपमा बढेको छ। बाढी स्याफ्रुबेँसीसम्म आइपुगेको जानकारी बाढी पूर्वानुमान महाशाखाले दिएको छ।  बाढी पूर्वानुमान महाशाखाले शुक्रबार दिउँसो १२ः३१ बजे सूचना जारी गर्दै भोटेकोसीमा बाढी बढिरहेको र स्याफ्रुबेँसीसम्म आइपुगेकाले त्रिशूली नदीको तटीय क्षेत्र मुग्लिनसम्म उच्च सतर्कता अपनाउन आग्रह गरेको छ। अर्को सूचना नआएसम्म नदी किनारमा रहेका नागरिकलाई सुरक्षित स्थानमा रहन भनिएको छ।  यसअघि भदौ १० गते भोटेकोसीमा आएको विनाशकारी बाढीले रसुवा, नुवाकोट, धादिङ हुँदै चितवनसम्म ठूलो क्षति पुर्‍याएको थियो। सरकारी प्राविधिक अध्ययनअनुसार सो बाढी तिब्बततर्फबाट ठूलो पानीको बहाव प्रवेश गरेपछि आएको थियो र करिब ६ घण्टा १५ मिनेटमा देवघाटसम्म पुगेको थियो।  यसपटक पनि चीनतर्फ नदी थुनिएर बनेको ताल फुटेको वा फुट्न थालेको सूचनापछि भोटेकोसीमा पानीको बहाव बढेको बताइएको छ। जोखिमलाई मध्यनजर गर्दै उद्धार तथा राहतमा खटिएका सुरक्षाकर्मी र सर्वसाधारणलाई समेत सतर्क रहन आग्रह गरिएको छ।  भोटेकोसी–त्रिशूली नदी किनारका बासिन्दाले तत्काल नदीतटबाट टाढा सुरक्षित तथा अग्लो स्थानमा जानु र प्रशासनको अर्को सूचना नआएसम्म नदी आसपास नफर्किनु उचित हुन्छ।

Originally published on abcnews.com.np.