काठमाडौँ । तिब्बतमा पुनः ड्याम फुटेको सूचनापछि भोटेकोसी नदी किनारमा रहेका उद्धार कार्य प्रभावित भएका छन्। सुरक्षाकर्मीले आफ्नो फौजलाई तत्काल सुरक्षित स्थानतर्फ जान निर्देशन दिएका हुन्। सैनिक प्रवक्ता सहायक रथी राजाराम बस्नेतले भोटेकोसीमा पानीको बहाव करिब दुई फिटसम्म बढेको जानकारी दिनुभयो।

प्रवक्ता बस्नेतले टिमुरेमा पनि सेनाको अलर्ट टोली परिचालन गरिएको बताए। ‘हाम्रो टोली अहिले प्रभावित क्षेत्रमै छ,’ उनले भने, ‘सुरुङमार्ग नजिक रहेका उद्धार टोलीहरूलाई सुरक्षित स्थानमा रहन निर्देशन दिएका छौँ।’

खोला केन्द्रित उद्धार कार्यमा उच्च सतर्कता अपनाइएको सेनाले जनाएको छ। तर, अन्य स्थानमा भने उद्धार तथा राहत वितरण लगायतका काम जारी रहेको छ। पानीको बहाव बढेपछि स्थानीय प्रशासनले पनि नदी किनार आसपासका बासिन्दालाई सुरक्षित हुन सूचना जारी गरेको छ।

प्रशासनको चेतावनी

बाढीको जोखिम बढ्दै गएपछि प्रशासनले नदी किनार नजिक बस्ने सर्वसाधारणलाई उच्च सावधानी अपनाउन अनुरोध गरेको छ। नदी किनारा क्षेत्रमा जान नहुने र तत्काल सुरक्षित स्थानमा आश्रय लिन आग्रह गरिएको छ। स्थानीय वस्तीमा सूचना केन्द्र स्थापना गरी उद्दार तथा राहतका लागि तयारी अवस्था राखिएको छ।

Originally published on abcnews.com.np.