धनगढी । सुदूरपश्चिम प्रदेश सरकारले रसुवाको भोटेकोसी बाढी प्रभावितहरूको राहत, उद्धार तथा खोजतलासका लागि दुई करोड रुपैयाँ सहयोग गर्ने निर्णय गरेको छ।

मुख्यमन्त्री खगराज भट्टको अध्यक्षतामा शुक्रबार बसेको प्रदेश मन्त्रिपरिषद् बैठकले प्रदेश सरकारका तर्फबाट उक्त रकम प्रधानमन्त्री दैवी प्रकोप उद्धार कोषमा उपलब्ध गराउने निर्णय गरेको हो।

बैठकले प्रदेश सरकारका सबै मन्त्रीले एक–एक महिनाको पारिश्रमिकसमेत बाढीपीडितको सहयोगका लागि उपलब्ध गराउने निर्णय गरेको छ।

यस्तै, बाढी प्रभावित क्षेत्रमा घाइते तथा बिरामीको उपचारका लागि स्वास्थ्य टोली पठाउने निर्णय पनि गरिएको छ। प्रभावित नागरिकको स्वास्थ्य उपचार तथा आवश्यक औषधिको व्यवस्थापनका लागि प्रदेश सरकारले स्वास्थ्यकर्मीको टोली परिचालन गर्ने जनाएको छ।

यसैगरी, मन्त्रिपरिषद् बैठकले सुदूरपश्चिम प्रदेश नीति तथा योजना आयोगको उपाध्यक्षमा गोकर्णप्रकाश भट्टलाई नियुक्त गर्ने निर्णय गरेको छ।

आयोगका सदस्यमा गंगादत्त जोशी र हिरा चन्द नियुक्त भएका छन्।

प्रदेश नीति तथा योजना आयोग लामो समयदेखि पदाधिकारीविहीन रहेकामा सरकारले उपाध्यक्षसहित दुई सदस्य नियुक्त गरेसँगै आयोगको कामकारबाहीलाई गति दिने तयारी गरेको छ।

Originally published on abcnews.com.np.