संघका संस्थापक अध्यक्ष डा. उपेन्द्र महतो र केन्द्रीय उपाध्यक्ष रोजिना प्रधान राईसहितको टोलीले नुवाकोटको बट्टार, त्रिशूली बजारलगायत प्रभावित क्षेत्रको स्थलगत अवलोकन गरी राहत सामग्री वितरण गरेको हो।

स्थलगत निरीक्षणपछि डा. महतोले सञ्चारमाध्यम र सामाजिक सञ्जालमा देखिएकोभन्दा वास्तविक क्षति निकै भयावह रहेको बताउनुभयो। उहाँले उद्धार तथा राहतको प्राथमिक समय भएकाले खाद्यान्न, लत्ताकपडा, औषधि र टेन्टलगायत सामग्री लिएर प्रभावित क्षेत्रमा आएको जानकारी दिनुभयो।

उहाँका अनुसार पहिलो चरणमा ५ करोड रुपैयाँ बराबरको राहत वितरण गरिनेछ। त्यसपछि नेपाल सरकारसँग समन्वय गरी प्रभावित क्षेत्रको पुनःस्थापना तथा पुनर्निर्माणमा गैरआवासीय नेपालीको भूमिकाबारे छलफल गरिनेछ।

संघकी केन्द्रीय उपाध्यक्ष रोजिना प्रधान राईले विपद्को घडीमा विदेशमा रहेका नेपालीहरूको मनसमेत पीडितसँगै रहेको बताउनुभयो। उहाँले पीडितलाई सहयोग गर्नु सबैको कर्तव्य भएको उल्लेख गर्नुभयो।

राईका अनुसार एनआरएनएले युएन मापदण्डअनुसारका पाल, खाद्यान्न र औषधिजस्ता अत्यावश्यक सामग्री प्रभावित क्षेत्रमा पुर्‍याएको छ। राहत वितरणलाई प्रभावकारी बनाउन स्थानीय प्रशासन, प्रमुख जिल्ला अधिकारीको कार्यालय र स्थानीय तहसँग समन्वय गरिने उहाँले बताउनुभयो।

विगतमा भूकम्प तथा कोभिड–१९ महामारीका बेला पनि संघले सक्रिय भूमिका निर्वाह गरेको स्मरण गर्दै राईले आगामी दिनमा प्रभावित क्षेत्रको पुनःस्थापना र पुनर्निर्माणमा समेत सरकारसँग सहकार्य गर्ने प्रतिबद्धता व्यक्त गर्नुभयो।

एनआरएनएको टोलीले नुवाकोटपछि बाढीपहिरोबाट प्रभावित अन्य जिल्लामा पुगेर समेत राहत सामग्री वितरण गर्ने जनाएको छ। प्रभावित क्षेत्रमा नेपाली सेनालगायत सुरक्षा निकायले बेपत्ताको खोजी तथा घाइतेको उद्धार कार्य जारी राखेका छन्।