बझाङ, ६ चैत । बझाङको छविस पाथिभेरा गाउँपालिकामा विदेशी दाताको सहयोगमा स्थापना भएको जिल्लाकै दोस्रो सुविधा सम्पन्न अस्पतालमा कर्मचारी अभावमा तीन वर्षदेखि बन्द भएको छ ।

अस्पताल बन्द भएपछि झण्डै एक करोडभन्दा बढी मुल्यका संरचना र उपकरणहरु समेत तोडफोड भएर काम नलाग्ने अवस्थामा पुगेका छन । साबिकको मटेला गाविसको जिउली गाउँस्थित डोब्रा सामुदायिक अस्पताल बेवारिसे भएपछि भवनका झ्याल ढोकाहरु तोडफोड भएका छन । भित्र रहेका उपकरणहरुमा पनि क्षति पुगेको छ ।

अस्पतालमा रहेका उपकरणहरु लाखौं मुल्य पर्ने एक्सरे मेसिन, जेनेरेटर, बेड, टेबुल, कुर्षी, उपचारका औजारहरु खिया लाग्ने अवस्थामा छन ।

बचे खुचेको औसधी पनि सडेको छ । कोठा भित्रका फर्निचर र उपकरणहरु धुलाम्मे छन । झट्ट हेर्दा अस्पताल कवाडी भण्डार जस्तो देखिन्छ । भाडेवगर जयपृथ्वी नगर सडक खन्दा डोजरले अस्पतालको आगनको डिल ताछेपछि अस्पतालका ४ वटामध्ये एउटा भवन चर्किएर भत्किनै लागेको छ भने दुइवटा अरु भवन पनि जोखिममा छन ।

‘केटाकेटी र गोठालाहरुको खेल्ने ठाउँ भएको छ । स्थानीय शान्ति रेग्मीले भनिन– ‘जसले जे गरे पनि कसैलाई मतलब छैन । हुँदा हुँदा घर पनि काम नलाग्ने भैसक्यो ।’ स्थानीयय स्तरमा गुणस्तरीय सेवा दिइरहेको अस्पताल हेर्दाहेर्दे खतम भएको उनले बताइन ।

‘‘जङ्गल छेउमा भएको हुँदा पशु चौपायाको चरन स्थल र केटाकेटीको खेल्ने ठाउँ भएको छ’ व्याँसीकी सर्मिला थापाले भनिन– ‘पहिला बिरामी पर्दा घर नजिकै उपचार पाइएला भनेर पेटमा पटुका कसेर श्रमदान गर्यौ, अहिले अस्पतालको हालत यस्तो छ ।’

यो अस्पताल २०६६ सालमा जापानी राजदुतावासको ६१ लाख ५० हजार साविक ब्याँसी गाविसको ७० हजार, मटेला गाविसको ३ लाख र स्थानीय बासिन्दाको ५० लाख भन्दा बढी जनश्रमदानबाट निर्माण भएको थियो ।

राष्ट्रिय योजना आयोगले हेल्थ असिस्टेन्ट तीन जना, अनमी एकजना र दुई जना अहेब पदका स्वयंसेवक कर्मचारी खटाएपछि यो अस्पताल ४ वर्ष जति संचालनमा आएको थियो । ‘स्वयंसेवकहरुको अवधि सकिएपछि उनीहरु फर्किएनन् । अरु कर्मचारीको व्यवस्था गर्न सकिएन’ अस्पताल व्यवस्थापन समितिका सचिव खड्क रावलले भने ‘कर्मचारी खटाई दिनका लागि धेरै ठाउँमा पहल गर्यौ । कतैबाट सहयोग भएन ।’

आफुहरुले जिल्ला र केन्द्र स्तरमा अस्पताल संचालनका लागि पटक–पटक पहल गरे पनि कतैबाट वास्ता नगरिएको पछि आफुहरुले सहयोगको लागि पहल गर्नै छोडेको उनले बताए ।

अस्पताल बन्द भएपछि छविस पाथिभेरा र दुर्गाथली गाउँपालिका क्षेत्रका साविकका आठ गाविसका बासिन्दालाई सामान्य उपचारका लागि सदरमुकाम र बाहिरी जिल्ला धाउनु पर्ने बाध्यता रहेको र आपतकालिन उपचार नपाएर कतिपयले ज्यान गुमाइ सकेको उनले बताए ।

व्यवस्थापन समितिका पदाधिकारीले यस्तो बताएपनि व्यवस्थापन समितिको कमजोरीका कारण अस्पताल बन्द हुन पुगेको स्थानीयहरुको आरोप छ । अस्पताल बन्द भए पनि भौतिक संरचना र उपकरणको सुरक्षामा समितिले व्यवास्ता गरेको स्थानीयको भनाइ छ ।

अस्पताललाई पुनसंचालनमा ल्याउनका लागि गाउँपालिकाले पहल गर्ने सोच बनाएको छविस पाथिभेरा गाउँपालिकाका अध्यक्ष अक्कल धामीले बताए । उनले अस्पताल व्यवस्थापन समितिसँग छलफल गरेपछि अस्पताललाई आवश्यक पर्ने जनशक्तिको व्यवस्थापन गरिने बताए ।