काठमाडौं । नुवाकोटमा रहेको अपर त्रिशूली–३ ‘बी’ जलविद्युत् आयोजनाको क्याम्प क्षेत्र पहिरोको लेदोले पूर्ण रूपमा पुरिएको छ। ऊर्जा, जलस्रोत तथा सिँचाइ मन्त्रालयका अनुसार घटनास्थलको अवस्था अत्यन्त कठिन र जोखिमपूर्ण रहेको छ।

क्याम्प क्षेत्र पहिरोको लेदोले पुरिएपछि त्यहाँ फसेकाहरूको खोज तथा उद्धारसँगै घटनास्थलसम्म पहुँच स्थापित गर्ने काम चुनौतीपूर्ण बनेको मन्त्रालयले जनाएको छ। जोखिमपूर्ण अवस्था रहे पनि उद्धार र पहुँच निर्माणको काम निरन्तर भइरहेको मन्त्रालयको भनाइ छ।

घटनास्थलको अवस्थाबारे जानकारी लिन हेलिकप्टरमार्फत पटक–पटक हवाई निरीक्षण भइरहेको छ। हवाई निरीक्षणबाट प्राप्त सूचनाका आधारमा खोज तथा उद्धारको रणनीति तय गरी काम अघि बढाइएको मन्त्रालयले जनाएको छ।

उद्धार तथा घटनास्थलसम्म पहुँच स्थापना गर्न आवश्यक उपकरणसमेत हेलिकप्टरमार्फत पुर्‍याइएको छ। उपकरण परिचालन गरी घटनास्थलमा उद्धार तथा पहुँच निर्माणको काम सुरु गरिएको मन्त्रालयले जनाएको छ।

आयोजनाले मानवीय उद्धारलाई पहिलो प्राथमिकतामा राखिएको जनाएको छ। सबैको सुरक्षित उद्धार नभएसम्म खोज तथा उद्धार प्रयास निरन्तर जारी राखिने आयोजनाको भनाइ छ।

घटनास्थलको संवेदनशील अवस्थालाई ध्यानमा राख्दै आयोजनाले अपुष्ट सूचना तथा हल्लाको पछि नलाग्न सर्वसाधारणलाई आग्रह गरेको छ। आयोजनाले घटनासम्बन्धी जानकारीका लागि आधिकारिक स्रोतबाट प्राप्त सूचनामात्र विश्वास गर्न अनुरोध गरेको छ।

Originally published on abcnews.com.np.