काठमाडौं । लगातारको वर्षासँगै आएको बाढी तथा पहिरोका कारण देशका विभिन्न स्थानमा मुख्य तथा सहायक राजमार्ग अवरुद्ध भएका छन्। सडक अवरुद्ध हुँदा यात्रु तथा सवारीसाधनको आवागमन प्रभावित भएको छ भने जोखिमयुक्त सडकखण्डमा सुरक्षा सतर्कता बढाइएको छ।

प्रहरी प्रधान कार्यालयका अनुसार काठमाडौं उपत्यकासहित कोशी, बागमती, लुम्बिनी र कर्णाली प्रदेशका विभिन्न सडकखण्ड बाढी तथा पहिरोका कारण प्रभावित भएका छन्। कतिपय सडक पूर्ण रूपमा अवरुद्ध छन् भने केही स्थानमा एकतर्फी रूपमा मात्र सवारी सञ्चालन भइरहेको छ।

नागढुङ्गा–मुग्लिन सडकमा सतर्कता

काठमाडौंमा नागढुङ्गादेखि मुग्लिनसम्मको सडकखण्डअन्तर्गत नागढुङ्गा क्षेत्रमा बाढीको सम्भावित जोखिम देखिएपछि आवागमनमा सतर्कता अपनाइएको छ। जोखिमलाई ध्यानमा राख्दै उक्त सडकखण्डमा एकतर्फी रूपमा सवारी सञ्चालनको व्यवस्था गरिएको प्रहरीले जनाएको छ।

मेची राजमार्ग अवरुद्ध

कोशी प्रदेशको इलाममा अविरल वर्षाका कारण इलाम नगरपालिका–८ राजदुवालीदेखि झापा तथा ताप्लेजुङतर्फ जाने सडक प्रभावित भएको छ।

मेची राजमार्गअन्तर्गत उक्त सडकखण्ड पूर्ण रूपमा अवरुद्ध रहेको प्रहरीले जनाएको छ। यात्रु तथा सवारीसाधनका लागि वैकल्पिक मार्गबाट आवागमनको व्यवस्था मिलाइएको छ।

काभ्रे र मकवानपुरमा पनि आवागमन नियन्त्रण

बागमती प्रदेशमा बाढी तथा पहिरोका कारण विभिन्न सडकखण्ड प्रभावित भएका छन्।

काभ्रेमा सम्भावित बाढीको जोखिमका कारण सुन्थली–नेपालथोक–खड्पुबेँसी–साल्ले सडकखण्डमा निश्चित समयका लागि सवारी सञ्चालनमा रोक लगाइएको छ। जोखिमको अवस्था मूल्याङ्कन गरी बिहानदेखि साँझसम्म आवश्यकताअनुसार सवारी सञ्चालन गर्ने वा रोक्ने व्यवस्था गरिएको छ।

मकवानपुरमा पनि सम्भावित बाढी तथा पहिरोका कारण हेटौँडा–भीमफेदी–बागमती–ललितपुर सडकखण्ड प्रभावित भएको छ। कान्तिलोकपथअन्तर्गत पर्ने उक्त सडकमा जोखिमलाई ध्यानमा राख्दै समयअनुसार सवारी सञ्चालनमा नियन्त्रण गरिएको छ।

रसुवा र नुवाकोटमा सडक सम्पर्क प्रभावित

रसुवामा बाढीका कारण उत्तरगया गाउँपालिका–५ लगायतका क्षेत्रमा सडक प्रभावित भएको छ। त्रिशूली–मैलुङ–स्याफ्रुबेँसी सडकखण्ड अवरुद्ध भएपछि मुख्य सडकबाट हुने आवागमन प्रभावित भएको छ।

नुवाकोटमा शिवपुरी गाउँपालिका–५ पञ्चखोला क्षेत्रमा बाढी तथा पहिरोको सम्भावित जोखिम देखिएपछि टोखा–छहरे सडकखण्डमा सवारी सञ्चालन रोकिएको प्रहरीले जनाएको छ।

मुख्य राजमार्गतर्फसमेत बाढीका कारण यातायात प्रभावित भएको छ।

पृथ्वी राजमार्गका विभिन्न स्थानमा जोखिम

धादिङमा पृथ्वी राजमार्गअन्तर्गत विभिन्न स्थानमा बाढीका कारण सडक प्रभावित भएको छ।

बेनीघाटरोराङ गाउँपालिका–१० ज्वालामुखी, गजुरी गाउँपालिका–२ बिहानीपम्प, गजुरी–५ गलौदी तथा गजुरी–६ महादेवबेँसीलगायतका क्षेत्रमा बाढी तथा पहिरोको जोखिम देखिएको प्रहरीले जनाएको छ।

तीमध्ये केही स्थानमा एकतर्फी रूपमा सवारी सञ्चालन भइरहेको छ।

अरनिको राजमार्गदेखि सहिद राजमार्गसम्म अवरुद्ध

सिन्धुपाल्चोकको भोटेकोशी गाउँपालिका–२ कोदारी क्षेत्रमा पहिरो खसेपछि अरनिको राजमार्ग पूर्ण रूपमा अवरुद्ध भएको छ। सडक अवरुद्ध भएपछि उक्त क्षेत्रमा सवारी आवागमन ठप्प भएको छ।

लुम्बिनी प्रदेशको रोल्पामा परिवर्तन गाउँपालिका–८ खुमिलबाट क्षेत्रमा पहिरो खसेपछि सहिद राजमार्ग पूर्ण रूपमा अवरुद्ध भएको छ।

त्यस्तै, कर्णाली प्रदेशको रुकुम पश्चिममा आठबिसकोट नगरपालिका–६ रिगनाड खोलामा बाढी आएपछि जाजरकोट–डोल्पा सडकखण्ड पूर्ण रूपमा अवरुद्ध भएको प्रहरीले जनाएको छ।

यात्रुलाई सावधानी अपनाउन आग्रह

प्रहरीका अनुसार जोखिमयुक्त सडकखण्डमा तत्काल यातायात सञ्चालन गर्नुभन्दा यात्रु तथा सवारीसाधनको सुरक्षालाई प्राथमिकता दिइएको छ।

मौसम तथा सडकको अवस्था सुधार भएपछि सम्बन्धित निकायसँग समन्वय गरी अवरुद्ध सडक खुलाउने तथा आवश्यकताअनुसार वैकल्पिक मार्गबाट यातायात सञ्चालन गर्ने तयारी गरिएको छ।

प्रहरीले रातिको समयमा जोखिमयुक्त सडकमा यात्रा नगर्न, सडकको अवस्था बुझेर मात्र यात्रा गर्न र बाढी आएको स्थानमा जबर्जस्ती सवारी नचलाउन सर्वसाधारणलाई आग्रह गरेको छ।

सडकमा अचानक बाढी आउने, पहिरो खस्ने तथा ढुंगा झर्ने जोखिम रहेकाले यात्राका क्रममा विशेष सावधानी अपनाउनसमेत प्रहरीले अनुरोध गरेको छ।

Originally published on abcnews.com.np.