साम्पाङले सामाजिक सञ्जालमा भिडियो सार्वजनिक गर्दै उपाध्यायले आफूलाई तथा आफ्नो पार्टीलाई बदनाम गराउन उक्त सामग्री प्रचार गरेको दाबी गरेका हुन्। उनले उपाध्यायको आलोचना गर्दै आफ्ना समर्थकलाई उनलाई बहिष्कार तथा तिरस्कार गर्नसमेत आग्रह गरेका छन्।

साम्पाङका अनुसार सरकारले बाढी प्रभावितका लागि राहत संकलन गर्न सार्वजनिक गरेको प्रधानमन्त्री राहत कोषको क्यूआर कोडलाई सम्पादन गरी त्यसमा श्रम संस्कृति पार्टीको क्यूआर राखिएको थियो।

उनले उक्त सामग्री आफूहरूले तयार नगरेको दाबी गर्दै उपाध्यायले नै सो सामग्री बनाएर प्रचार गरेको आरोप लगाए।

“सरकारले राहत संकलनका लागि प्रधानमन्त्री राहत कोषको क्यूआर सार्वजनिक गरेको थियो। त्यसलाई एडिट गरेर श्रम संस्कृतिको क्यूआर लगाउने काम कसले गरेको रहेछ भन्दा अरू कोही नभएर भीम उपाध्यायले गरेको देखिन्छ,” साम्पाङले भिडियोमा भनेका छन्।

उनले उपाध्याय आफ्नो पार्टीका कट्टर विरोधी रहेको दाबी गर्दै उक्त सामग्री सबैभन्दा पहिले कसले सार्वजनिक गरेको हो भन्ने प्रमाण देखाउन चुनौतीसमेत दिएका छन्।

यसैबीच, उपाध्यायले सामाजिक सञ्जालमा प्रधानमन्त्री राहत कोषको क्यूआर भन्दै श्रम संस्कृति पार्टीको क्यूआर राखिएको सामग्री सार्वजनिक गरेका थिए। उनले उक्त विषयमा तत्काल छानबिन गरी त्यसबाट कति रकम संकलन भएको हो भन्ने यकिन गर्न माग गरेका छन्।

तर, उक्त क्यूआर कसले सम्पादन गरेको हो र त्यसबाट वास्तवमा रकम संकलन भएको थियो वा थिएन भन्ने विषयमा स्वतन्त्र पुष्टि वा आधिकारिक छानबिनको विवरण भने सार्वजनिक भइसकेको छैन।

साम्पाङ र उपाध्यायबीच सामाजिक सञ्जालमा यसअघि पनि विभिन्न विषयमा सार्वजनिक रूपमा आरोप–प्रत्यारोप हुँदै आएको छ। पछिल्लो विवादले राहत संकलनका लागि प्रयोग हुने क्यूआरको आधिकारिकता र डिजिटल सामग्रीको सत्यापनबारे समेत प्रश्न उठाएको छ।