नारायणगढ । रसुवा बाढीमा परी चितवनमा फेला परेका पहिचान हुन नसकेका २२९ शव तथा शवका अवशेष व्यवस्थापन गरिने भएको छ। जिल्ला प्रशासन कार्यालय चितवनले पहिचान हुन नसकेका तथा बेवारिसे शव व्यवस्थापनसम्बन्धी निर्देशिकाबमोजिम शव व्यवस्थापन गर्ने निर्णय गरेको हो। बाढीपछि चितवनमा संकलन गरिएका २३३ शवमध्ये चारवटाको मात्र पहिचान भएको छ। बाँकी शवमध्ये केही होल्डिङ सेन्टर तथा स्वास्थ्य संस्थामा राखिएका छन्। लामो समयदेखि राखिएका शव सडगलिसकेको र पहिचान गर्न कठिन अवस्था रहेकाले संक्रमणको जोखिमसमेतलाई ध्यानमा राख्दै सम्मानजनक तथा कानुनी प्रक्रियाबाट व्यवस्थापन गर्न लागिएको प्रशासनले जनाएको छ। शव व्यवस्थापन गर्नुअघि आवश्यक नमुना संकलन गरी डीएनए परीक्षणका लागि सुरक्षित राखिनेछ। पहिचान नभएका शव तथा अवशेषलाई भरतपुर महानगरपालिका–१, देवघाटस्थित खुला स्थानमा व्यवस्थापन गर्ने तयारी गरिएको छ। चितवनका प्रमुख जिल्ला अधिकारी गणेश अर्यालका अनुसार शव गाडिएपछि पनि आफन्तले डीएनए परीक्षण तथा अभिलेखका आधारमा भविष्यमा सनाखत गर्न सक्ने व्यवस्था मिलाइनेछ। यसैबीच, जलदेवी सामुदायिक वनले बाढीमा परी मृत्यु भएकाहरूको दाहसंस्कारका लागि आवश्यक दाउरा निःशुल्क उपलब्ध गराउने भएको छ। चितवनमा भेटिएका शव दाहसंस्कार गर्न आवश्यक परेमा निःशुल्क दाउरा उपलब्ध गराइने वनका सचिव माधव भुसालले जानकारी दिनुभयो। जिल्ला प्रशासनको अनुरोधअनुसार शव व्यवस्थापनका लागि आवश्यक जमिनसमेत उपलब्ध गराइएको उहाँले बताउनुभयो।

Originally published on abcnews.com.np.