काठमाडौं । रसुवा बाढीबाट प्रभावित नागरिकको उद्धार तथा राहतका लागि तिलगंगा आँखा प्रतिष्ठानले १ करोड रुपैयाँ सहयोग गर्ने भएको छ।

प्रतिष्ठानले कर्मचारीबाट एक दिनको तलब बराबरको रकमसमेत प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको जनाएको छ।

त्यस्तै, बाढी प्रभावित क्षेत्रमा घाइते तथा बिरामी भएका नागरिकको आँखासम्बन्धी उपचार निःशुल्क गर्ने निर्णय पनि प्रतिष्ठानले गरेको छ।

प्रतिष्ठानअन्तर्गत रसुवा, नुवाकोट र धादिङमा कार्यरत कर्मचारीलाई ग्रामीण आँखा केन्द्रको सहयोगमा टोली बनाएर बाढी प्रभावित क्षेत्रमा परिचालन गरिएको छ। उक्त टोलीले जिल्ला दैवी प्रकोप समन्वय समितिसँग समन्वय गरी प्रभावित समुदायको आवश्यकताअनुसार आँखा परीक्षण तथा उपचार गर्ने प्रतिष्ठानले जनाएको छ।

नेपाल आँखा कार्यक्रम, तिलगंगा आँखा प्रतिष्ठान परिवारले आर्जन गरेको रकम तथा देशभित्र र बाहिर रहेका शुभेच्छुक एवं सहयोगीबाट प्राप्त रकमबाट सरकारको उद्धार, राहत तथा पुनर्स्थापनाका लागि सहयोग गरिएको प्रतिष्ठानले जनाएको छ।

प्रतिष्ठानले बाढी प्रभावित नागरिकको उपचार तथा राहतमा थप सहयोग पुर्‍याउने प्रतिबद्धता जनाएको छ।

Originally published on abcnews.com.np.