काठमाडौं । विश्वको लोकप्रिय सर्च इन्जिन गुगलले नेपालमा बाढी तथा प्राकृतिक विपद्का बेला नागरिकलाई छिटो र सहज रूपमा सूचना उपलब्ध गराउने उद्देश्यले ‘आपत्कालीन सूचना सेवा’ सुरु गरेको छ ।

यो सेवा सञ्चालनमा आएपछि बाढी वा अन्य प्राकृतिक विपद्को जोखिम देखिँदा गुगलको गृहपृष्ठमा ‘नेपाल फ्ल्यास फ्लड इमर्जेन्सी इन्फो एन्ड अपडेट्स’ (Nepal Flash Flood Emergency Info and Updates) नामको लिङ्क देखिनेछ ।

उक्त लिङ्कमा प्रवेश गरेपछि प्रयोगकर्ताले विपद्बाट प्रभावित क्षेत्रको नक्सा, गुगलका बाढीसम्बन्धी ‘फ्लड अलर्ट’ तथा विभिन्न अन्तर्राष्ट्रिय सञ्चारमाध्यममा प्रकाशित समाचार एकै स्थानबाट हेर्न सक्नेछन् ।

विशेषगरी बाढीको जोखिम बढेका बेला नागरिकले प्रभावित क्षेत्र, सम्भावित जोखिम र पछिल्लो अवस्थाबारे छिटो जानकारी पाउन सक्ने भएकाले यो सेवा आपत्कालीन सूचना प्रवाहका लागि उपयोगी हुने अपेक्षा गरिएको छ ।

नेपालमा पछिल्लो समय बाढी तथा पहिरोजस्ता प्राकृतिक विपद्का घटना बढिरहेका बेला गुगलले सुरु गरेको यो सेवाले विश्वसनीय सूचना एकै ठाउँमा उपलब्ध गराई नागरिकलाई समयमै सचेत गराउन सहयोग पुग्ने विश्वास गरिएको छ ।

Originally published on abcnews.com.np.