काठमाडौं । नेपाल–चीन सीमानजिकै पहिरोका कारण नदी थुनिएर बनेको कृत्रिम ताल भरिएपछि पानी बाहिर बग्न थालेको छ । चिनियाँ अधिकारीहरूले आइतबार तालबाट पानीको निकास सुरु भएसँगै हाल समग्र स्थिति नियन्त्रणमा रहेको जानकारी दिएका छन् ।

चिनियाँ सरकार नियन्त्रित सञ्चारमाध्यम सीसीटीभीमार्फत प्रसारित तिब्बत क्षेत्रीय सरकारको पत्रकार सम्मेलनमा अधिकारीहरूले कृत्रिम ताल भरिएर पानीको निकास सुरु भइसकेको र हाल अवस्था स्थिर रहेको बताएका छन् । उनीहरूका अनुसार ताल पूर्ण रूपमा भत्किने जोखिम पनि तुलनात्मक रूपमा निकै कम रहेको छ ।

चिनियाँ प्रारम्भिक अध्ययनअनुसार लाङटाङ लिरुङ हिमशृंखलानजिकै रहेको हिमनदीको ठूलो भाग भत्किएर नदीमा खसेपछि विशाल हिमपहिरो तथा पहिरो गएको थियो । हिउँ, चट्टान र पानी मिसिएको भीषण लेदो केरुङ नाकासम्म पुग्न ६ देखि ७ मिनेट मात्रै लागेको प्राविधिक अध्ययनले देखाएको छ ।

यति छोटो समयमा बाढी सीमा क्षेत्रमा आइपुगेकाले त्यहाँ रहेका नागरिक तथा तीर्थयात्रीलाई सुरक्षित स्थानमा पुग्न पर्याप्त समय नपाएको चिनियाँ अधिकारीहरूले बताएका छन् । तर, थुनिएको तालबाट पानी क्रमशः बाहिरिन थालेपछि तल्लो तटीय क्षेत्रमा थप ठूलो बाढी आउन सक्ने जोखिम केही कम भएको उनीहरूको भनाइ छ ।

नेपालतर्फ भने भोटेकोशी तथा त्रिशूली नदी किनारका क्षेत्रमा अझै उच्च सतर्कता अपनाउन आवश्यक रहेको अधिकारीहरूले बताएका छन् ।

Originally published on abcnews.com.np.