मुस्ताङ । उपल्लो मुस्ताङका उच्च हिमाली क्षेत्रमा सम्भावित हिमताल तथा बाढीको जोखिम पहिचानका लागि स्थलगत तथा ड्रोनमार्फत अनुगमन सुरु गरिएको छ ।

भोटेकोशीमा आएको विनाशकारी बाढीपछि उच्च हिमाली क्षेत्रमा विपद्को जोखिम पहिचान र पूर्वतयारीलाई तीव्रता दिँदै अनुगमन थालिएको हो । हालसम्म अनुगमन गरिएका क्षेत्रमा तत्काल जोखिमको संकेत नदेखिएको अधिकारीहरूले बताएका छन् ।

जिल्ला प्रशासन कार्यालय मुस्ताङको समन्वयमा सशस्त्र प्रहरी बल नेपालअन्तर्गत बीओपी नेचुङ, नेपाल प्रहरी, अन्नपूर्ण संरक्षण क्षेत्र आयोजना (एक्याप) लोमान्थाङ तथा संरक्षण क्षेत्र व्यवस्थापन समितिको संयुक्त टोलीले कालीगण्डकी नदी प्रणालीका मुहान र उच्च पर्वतीय क्षेत्रको अनुगमन गरिरहेको छ ।

एक्याप लोमान्थाङका प्रमुख उमेश पौडेलका अनुसार पहिलो चरणमा नेपाल–चीन सीमास्थित १८ र १९ नम्बर सीमास्तम्भ नजिक रहेका कालीगण्डकी नदी प्रणालीका दुई मुहानको स्थलगत तथा ड्रोनमार्फत निरीक्षण गरिएको थियो । निरीक्षणका क्रममा हिमपातको अवस्था र सम्भावित जोखिमको मूल्यांकन गरिएको र तत्काल कुनै जोखिम नदेखिएको उनले बताए ।

त्यसपछि लोमान्थाङ माथिको उच्च पर्वतीय क्षेत्रमा रहेको घ्याकरछु तालको निरीक्षण गरिएको छ । समुद्र सतहबाट करिब पाँच हजार ५५० मिटरको उचाइमा रहेको उक्त क्षेत्रमा ड्रोनमार्फत गरिएको निरीक्षणका क्रममा हिमनदीका ढिस्का देखिए पनि तत्काल जोखिमको संकेत नदेखिएको पौडेलले बताए ।

अब लोमान्थाङको चुमजुङमाथि रहेको छुआमा पिकको शिर तथा लोघेकर दामोदरकुण्ड–१ चराङमाथिको पर्वतीय क्षेत्रमा कालीगण्डकी नदी प्रणालीको अनुगमन गर्ने योजना रहेको छ । ती क्षेत्रमा जीपीएसबाट हिमताल रहेको देखिएपछि स्थलगत निरीक्षण गर्न लागिएको पौडेलले बताए ।

गत वर्ष लोमान्थाङको चुमजुङमाथि छुआमा पिकबाट कालीगण्डकी नदी प्रणालीमा लेदोसहितको बाढी आएपछि स्थानीय क्षेत्रमा जोखिम बढेको थियो ।

उच्च हिमाली क्षेत्रमा हिमताल फुट्ने, हिमपहिरो जाने वा बाढी आउन सक्ने सम्भावनालाई ध्यानमा राख्दै नदीका मुहान तथा संवेदनशील क्षेत्रको नियमित अनुगमनलाई निरन्तरता दिइने एक्यापले जनाएको छ ।

सम्भावित विपद्को जोखिम पहिचान, प्रारम्भिक चेतावनी र प्रभावकारी प्रतिकार्यका लागि उच्च हिमाली क्षेत्रमा नियमित अनुगमन तथा विपद् पूर्वतयारीलाई थप सुदृढ बनाउने तयारी गरिएको छ । रासस

Originally published on abcnews.com.np.