काठमाडौं । रसुवाको भोटेकोशी नदीमा पुनः बाढी आएको छ। ल्हेन्दे खोला हुँदै भोटेकोशीमा पानीको बहाव बढेर बाढी आएको रसुवाका सहायक प्रमुख जिल्ला अधिकारी द्रुपप्रसाद अधिकारीले जानकारी दिएका छन्।

बाढीको बहाव बढेसँगै नदी तथा खोलाको तटीय क्षेत्रमा बसोबास गर्ने नागरिकलाई उच्च सतर्कता अपनाउन स्थानीय प्रशासनले आग्रह गरेको छ। सहायक प्रजिअ अधिकारीका अनुसार सम्भावित मानवीय तथा भौतिक क्षतिबाट जोगिन जोखिमयुक्त क्षेत्रमा रहेका नागरिकले सावधानी अपनाउन आवश्यक छ।

यसअघि भदौ १० गते बुधबार ल्हेन्दे खोला हुँदै भोटेकोशीमा आएको विनाशकारी बाढीले रसुवा, नुवाकोट, धादिङलगायत जिल्लामा ठूलो मानवीय तथा भौतिक क्षति पुर्‍याएको थियो।

सो बाढीका कारण नदी किनारका बस्ती, सडक, पुल तथा जलविद्युत् आयोजनाका संरचनामा ठूलो क्षति पुगेको थियो भने ठूलो संख्यामा मानिसको ज्यान गएको तथा धेरै नागरिक अझै सम्पर्कविहीन रहेका छन्।

यसअघि आएको विनाशकारी बाढीबाट प्रभावित क्षेत्रमै पुनः पानीको बहाव बढेपछि उद्धार तथा राहत कार्यमा समेत थप चुनौती उत्पन्न हुन सक्ने भन्दै स्थानीय प्रशासनले तटीय क्षेत्रमा रहेका नागरिकलाई सुरक्षित स्थानमा रहन आग्रह गरेको छ।

प्रशासनले नदीको बहाव बढिरहेको अवस्थामा अनावश्यक रूपमा नदी तथा खोलाको किनारमा नजान र सम्भावित जोखिमप्रति सचेत रहन आग्रह गरेको छ।

Originally published on abcnews.com.np.