काठमाडौं । रसुवाको भोटेकोसी तथा त्रिशूली नदीमा आएको बाढीका कारण माथिल्लो त्रिशूली–३ ‘ए’ जलविद्युत् आयोजनामा फसेका व्यक्तिहरूको उद्धार कार्य सरकारले रातभर जारी राखेको जनाएको छ ।

प्रधानमन्त्रीको कार्यालयका अनुसार आइतबार बिहान करिब ४ बजे आयोजनास्थलमा पुनः बाढी आएपछि त्रिशूली नदीको जलसतह ५ देखि १० मिटरसम्म बढेको छ । नदीको सतह अत्यधिक बढेपछि आयोजना क्षेत्रको किनार तीव्र रूपमा कटान हुन थालेको कार्यालयले जनाएको छ ।

सरकारले उच्च सतर्कता अपनाउँदै आयोजना क्षेत्रमा जमेको माटो तथा लेदो हटाउन पुनः डोजर र भारी उपकरण परिचालन गर्ने तयारी गरेको छ । आयोजना क्षेत्रको समग्र क्षति तथा अवस्थाको अवलोकन गर्दै उद्धार र व्यवस्थापनको काम अघि बढाइने प्रधानमन्त्रीको कार्यालयले जनाएको छ ।

पहिरो र माटोले पुरिएको त्रिशूली–३ ‘ए’ आयोजनाको टनेल पोर्टल तथा पावर हाउस नियन्त्रण गर्ने १९ वटा सीसीटीभी क्यामेरा, एचडीआर र सेटअप बक्स सुरक्षित रूपमा निकाल्न हेलिकोप्टरमार्फत विशेष टोली परिचालन गर्ने तयारीसमेत गरिएको छ ।

सडक पहुँच अवरुद्ध रहेकाले पुरिएको भवननजिकै हेलिकोप्टरबाट टोली उतारेर महत्वपूर्ण उपकरण निकाल्ने तयारी गरिएको प्रधानमन्त्रीको कार्यालयले जनाएको छ ।

Originally published on abcnews.com.np.