पोखरा । पोखरा उद्योग वाणिज्य संघको कार्यसमितिमा विभिन्न पदमा प्यानलबाट निर्वाचन लड्दै वरिष्ठ उपाध्यक्षसम्म बनेका उत्तममान बुद्धाचार्यले आगामी निर्वाचनमा अध्यक्ष पदमा स्वतन्त्र उम्मेदवारी दिएका छन् ।

संघको ३६औँ महाधिवेशनका लागि अध्यक्ष पदका उम्मेदवार बुद्धाचार्यले सबै क्षेत्रका व्यवसायीलाई समेटेर संघलाई विधान र संस्थागत प्रणालीअनुसार अघि बढाउने प्रतिबद्धता व्यक्त गरेका छन् ।

आइतबार पोखरामा आयोजित प्रतिबद्धता पत्र सार्वजनिक तथा पत्रकार सम्मेलनमा उनले लामो समयदेखि व्यवसाय र सामाजिक क्षेत्रमा सक्रिय रहेको अनुभवलाई संघको नेतृत्वमा उपयोग गर्ने बताए ।

यसअघिको निर्वाचनमा प्यानलबाट प्रतिस्पर्धा गरेका बुद्धाचार्यले यसपटक भने स्वतन्त्र रूपमा अध्यक्ष पदमा उम्मेदवारी दिनुको कारणबारे पत्रकारको प्रश्नमा समूहमा विभिन्न व्यक्तिको भूमिका र प्रभाव हुनु स्वाभाविक रहेको बताए ।

उनले आफू २०४१ सालदेखि निरन्तर व्यवसायमा संलग्न रहेको र विभिन्न सामाजिक संस्थामार्फत समेत काम गर्दै आएको उल्लेख गरे । व्यवसायीका समस्या समाधानका लागि सम्बन्धित निकायसँग समन्वय गर्ने भूमिका संघले प्रभावकारी रूपमा निर्वाह गर्नुपर्ने उनको भनाइ छ ।

‘अब मलाई संघमा पर्याप्त समय दिने अवस्था छ । व्यवसायमा समय दिँदा मैले व्यवसायीका समस्या आफैं भोगेको र बुझेको छु । ती समस्यालाई समाधानका लागि सम्बन्धित निकायसम्म लैजाने माध्यम संघ हो,’ बुद्धाचार्यले भने ।

यसअघि प्यानलबाट निर्वाचनमा सहभागी भए पनि अध्यक्षमा स्वतन्त्र उम्मेदवारी दिएको विषयमा उनले आफू निर्वाचित भए सबैलाई साथमा लिएर अघि बढ्ने बताए ।

‘जितेर आए पनि उही साथीहरूसँग काम गर्ने हो । जो साथीहरू आउनुहुन्छ, उहाँहरूलाई सँगै लिएर त्यही टिम बनाएर काम अगाडि बढाउने हो,’ उनले भने ।

संघको वरिष्ठ उपाध्यक्षका रूपमा बिताएका दुई वर्षमा आफूले जिम्मेवारीपूर्वक काम गरेको बुद्धाचार्यले बताए । संस्थाको नेतृत्व व्यक्तिभन्दा विधान र संस्थागत प्रणालीअनुसार हुनुपर्नेमा उनले जोड दिए ।

‘व्यक्तिकेन्द्रित भए संस्था दिगो रहँदैन, विधानले संस्था चल्छ । मैले विधानले नै संस्था चलाउने हो,’ उनले भने ।

बुद्धाचार्यले संघलाई व्यवसायीको साझा आवाज, भरोसायोग्य संस्था तथा प्रभावकारी नीतिगत पैरवीको केन्द्रका रूपमा विकास गर्ने प्रतिबद्धता जनाए । संघ, प्रदेश तथा स्थानीय सरकारसँग निरन्तर संवाद र सहकार्य गर्दै उद्योग व्यवसायमैत्री नीति निर्माणका लागि पहल गर्ने उनको भनाइ छ ।

उनले सार्वजनिक गरेको प्रतिबद्धता पत्रमा व्यवसायीका दैनिक समस्या समाधानदेखि प्रविधि, बजार विस्तार, पर्यटन, लगानी र स्थानीय उत्पादन प्रवर्द्धनसम्मका १७ बुँदा समेटिएका छन् ।

प्रतिबद्धता पत्रमा व्यवसायीका लागि एकद्वार सहायता केन्द्र तथा विशेषज्ञ सहायता टिम, व्यवसायिक डेटा बैंक, डिजिटल प्रविधि तथा एआईको प्रयोग, युवा, महिला तथा स्टार्टअप उद्यमशीलता प्रवर्द्धनलगायतका विषय समावेश छन् ।

स्थानीय उत्पादनलाई राष्ट्रिय तथा अन्तर्राष्ट्रिय बजारसँग जोड्न ‘लोकल टु ग्लोबल’ अभियान तथा पोखरामा उत्पादित वस्तु तथा सेवाको प्रयोग र खरिद बढाउन ‘बाइ पोखरा’ अभियान सञ्चालन गर्ने योजना पनि उनले अघि सारेका छन् ।

त्यस्तै, व्यवसायीको मौज्दात व्यवस्थापन तथा बिक्रीमा सहयोग पुर्‍याउन ‘मिड इयर सेल’, व्यवसायीको सीप तथा क्षमता विकास, पर्यटन तथा लगानी प्रवर्द्धन, खेल पर्यटन र ‘ग्रेटर पोखरा’को अवधारणालाई समेत प्राथमिकतामा राखिएको छ ।

‘व्यवसायीको सम्मान, संस्थाको सुदृढीकरण र पोखराको समृद्धि’लाई मूल ध्येय बनाउँदै संघलाई आधुनिक, पारदर्शी, प्रविधिमैत्री र परिणाममुखी संस्थाका रूपमा विकास गर्ने बुद्धाचार्यले प्रतिबद्धता जनाएका छन् ।

पोखरा उद्योग वाणिज्य संघको ३६औँ महाधिवेशन भदौ २० र २१ गते हुँदैछ ।

Originally published on abcnews.com.np.