काठमाडौं ।  रसुवाको भोटेकोशी नदीमा आएको भीषण बाढीपछि मृत्यु हुनेको संख्या ९०३ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार सोमबार भदौ १५ गते बिहान ९ बजेसम्म विभिन्न जिल्लाबाट ९०३ जनाको शव फेला परेको हो।

बाढीमा सबैभन्दा धेरै शव चितवनमा २७२ वटा फेला परेका छन्। चितवनमा भेटिएका शवमा विभिन्न मानव अंगसमेत समावेश छन्।

प्राधिकरणका अनुसार रसुवामा २४, नुवाकोटमा ९५, धादिङमा ५५, गोरखामा ६२, नवलपरासी पूर्वमा २०७, नवलपरासी पश्चिममा १५१ र तनहुँमा ३७ जनाको शव फेला परेको छ।

४ हजारभन्दा बढी अझै सम्पर्कविहीन

विनाशकारी बाढीपछि अझै ४ हजार २४७ जना सम्पर्कविहीन रहेको प्राधिकरणले जनाएको छ।

सम्पर्कविहीन हुनेमा नेपाल प्रहरी, सशस्त्र प्रहरी, नेपाली सेना, विभिन्न जलविद्युत् आयोजना तथा भन्सार कार्यालयमा कार्यरत कर्मचारीसमेत छन्।

सम्पर्कविहीनमध्ये ५९२ जना विदेशी नागरिक रहेको जनाइएको छ। त्यस्तै, विदेशी पर्यटकसँगै भ्रमणमा गएका १२७ जना नेपाली नागरिक समेत अझै सम्पर्कविहीन छन्।

बाढी प्रभावित क्षेत्रमा बेपत्ता भएका नागरिकको खोजी तथा उद्धारका लागि सुरक्षा निकाय र अन्य उद्धार टोली परिचालन भइरहेका छन्।

१० हजारभन्दा बढीको उद्धार

प्राधिकरणका अनुसार बाढी प्रभावित क्षेत्रबाट हालसम्म १० हजार ४५१ जनाको उद्धार गरिएको छ।

बाढीका कारण घाइते भएका २६७ जनामध्ये १६५ जना उपचारपछि डिस्चार्ज भइसकेका छन् भने अन्य घाइतेको उपचार जारी रहेको छ।

खोज, उद्धार तथा राहत कार्यका लागि २० हजारभन्दा बढी सुरक्षाकर्मी प्रभावित क्षेत्रमा परिचालन गरिएको प्राधिकरणले जनाएको छ।

भदौ १० गते बिहान आएको भोटेकोशी बाढीले रसुवा, नुवाकोटलगायत जिल्लामा ठूलो मानवीय तथा भौतिक क्षति पुर्‍याएको छ। बाढीको बहावसँगै त्रिशूली र नारायणी नदीको तल्लो तटीय क्षेत्रमा समेत शव तथा बेपत्ताको खोजी विस्तार गरिएको छ।

Originally published on abcnews.com.np.