काठमाडौं । प्रमुख प्रतिपक्षी दल नेपाली कांग्रेसकी मुख्य सचेतक बासना थापाले भोटेकोसीमा आएको बाढीबाट प्रभावित क्षेत्रमा विपद् व्यवस्थापन र राहत वितरणमा संघीय सरकारको कार्यशैली प्रभावकारी हुन नसकेको बताएकी छन्।

सोमबार सिंहदरबारमा बसेको कांग्रेस संसदीय दलको बैठकपछि सञ्चारकर्मीसँग कुरा गर्दै थापाले बाढी प्रभावित क्षेत्रमा विशेषगरी महिला तथा बालबालिकाको अवस्था चुनौतीपूर्ण रहेको बताइन्।

उनले प्रभावित महिला तथा बालबालिकाका समस्या सम्बोधन गर्न मानव अधिकार र बाल अधिकारका क्षेत्रमा कार्यरत निकायलाई प्रभावकारी रूपमा काम गर्ने वातावरण बनाउन सरकारसँग आग्रह गरिन्।

‘केन्द्रिकृत सोचका कारण प्रदेश र स्थानीय तह कमजोर भए’

विपद्का बेला स्थानीय र प्रदेश सरकार प्रभावकारी देखिन नसकेको भन्ने प्रश्नमा थापाले यसको मुख्य कारण संघीय सरकारको केन्द्रिकृत कार्यशैलीभएको दाबी गरिन्।

“संघीय सरकारले सबै कार्य आफ्नै मातहत राखेर गर्ने नीति लिएका कारण प्रदेश र स्थानीय तहले अपेक्षित रूपमा काम गर्न नसकेका हुन्,” थापाले भनिन्।

उनका अनुसार राहत सामग्री पर्याप्त भए पनि स्थानीय र प्रदेश सरकारलाई आवश्यक अधिकार नदिँदा राहत वितरण व्यवस्थित हुन सकेको छैन।

थापाले विपद्का कारण स्थानीय जनप्रतिनिधिहरू स्वयं प्रभावित हुनुका साथै ठूलो मानवीय तथा भौतिक क्षति बेहोर्नुपरेको उल्लेख गर्दै उनीहरूलाई उचित समन्वय र जिम्मेवारीसहित परिचालन गर्नुपर्ने बताइन्।

‘अब अविलम्ब अधिकार प्रत्यायोजन गर्नुपर्छ’

थापाका अनुसार विपद्को सुरुवाती चरणमा संघीय सरकारले नै सबै जिम्मेवारी लिने नीति लिएपछि प्रदेश र स्थानीय तहले त्यसैअनुसार संघलाई सहयोग गरेका थिए। तर अहिले संघीय सरकार एक्लैले विपद् व्यवस्थापनको सम्पूर्ण जिम्मेवारी धान्न नसक्ने अवस्था देखिएको उनको भनाइ छ।

“सुरुमा संघले नै सबै जिम्मेवारी लिने भनेपछि स्थानीय र प्रदेशले त्यसैलाई सघाएका थिए। तर अहिले संघ एक्लैले धान्न नसक्ने अवस्था आएकाले अब अविलम्ब अधिकार प्रत्यायोजन गर्नुपर्छ,” उनले भनिन्।

विपद् व्यवस्थापनलाई प्रभावकारी र चुस्त बनाउन संघीय सरकारले स्थानीय तथा प्रदेश सरकारमाथि विश्वास गर्दै आवश्यक अधिकार र जिम्मेवारी हस्तान्तरण गर्नुपर्नेमा कांग्रेस मुख्य सचेतक थापाले जोड दिइन्।

Originally published on abcnews.com.np.