चितवन । रसुवाको भोटेकोसीमा आएको विनाशकारी बाढीपछि बेपत्ता भएकाहरूको खोजीका लागि नेपाली सेनाले चितवनमा खोज तथा उद्धार अभियान तीव्र बनाएको छ।

मध्य पृतनाको नेतृत्वमा गठित टास्क फोर्सअन्तर्गत नेपाली सेनाका विभिन्न युनिटले क्षेत्र विभाजन गरी नारायणी नदी तथा आसपासका क्षेत्रमा व्यापक खोजी गरिरहेका छन्।

नयाँ गोरख गण र नयाँ सबुज गणले संयुक्त रूपमा खोज तथा उद्धार अभियान सञ्चालन गरिरहेका छन्। नेपाली सेनाका अनुसार नयाँ गोरख गण, नयाँ सबुज गण तथा सिंहनाथ गणका कमाण्डो तालिमप्राप्त सैनिक टोली जोखिमपूर्ण तथा कठिन स्थानमा समेत नदीमा प्रवेश गरी खोजीमा जुटेका छन्।

नगर वन टापु क्षेत्रमा १० शव फेला

सेनाले सोमबार बिहान ५ बजेदेखि निरन्तर सञ्चालन गरेको खोजी अभियानका क्रममा नगर वन टापु क्षेत्रमा १० वटा शव फेला पारेको जनाएको छ।

त्यसैगरी थप दुई शवका अवशेषसमेत फेला परेको सेनाले जानकारी दिएको छ।

रसुवाको भोटेकोसीमा आएको बाढीपछि बगाएर ल्याएका मानिस तथा शव नारायणी नदी हुँदै चितवनसम्म आइपुगेको आशंकामा सेनाले नारायणीको तटीय क्षेत्रमा खोजीलाई केन्द्रित गरेको हो।

नेपाली सेनाले बेपत्ताको खोजी अभियान तत्काल नरोकिने र सम्भावित सबै क्षेत्रमा निरन्तर खोजी तथा उद्धार कार्य जारी राख्ने जनाएको छ।

Originally published on abcnews.com.np.