नुवाकोट । भोटेकोसी बाढीका कारण अवरुद्ध बनेको नुवाकोटको विदुर नगरपालिका–१ स्थित ढुङ्गे क्षेत्रमा यातायात सेवा सञ्चालनमा आएको छ।

विदुरबाट ढुङ्गे हुँदै सवारीसाधन सञ्चालनमा आएपछि बाढी प्रभावित क्षेत्रमा आवागमन सहज भएको हो। बाढीबाट क्षति पुगेका सडक तथा डुबानमा परेका बस्तीमा यातायात सञ्चालनलाई जिल्ला विपद् व्यवस्थापन समितिले प्राथमिकतामा राखेर काम अघि बढाएको थियो।

ढुङ्गेबजार क्षेत्रमा सडक तथा बस्तीमा थुप्रिएको माटो, ढुंगा तथा अन्य अवरोध हटाएपछि आवागमन सहज भएको विदुर नगरपालिकाका नगरप्रमुख राजन श्रेष्ठले जानकारी दिए।

सडक सञ्चालनमा आएपछि शव व्यवस्थापन, क्षति पुग्न बाँकी घरबाट सामान सुरक्षित स्थानमा सार्न तथा बेत्रावतीसम्म पुग्न सहज भएको नगरप्रमुख श्रेष्ठले बताए। सडक मर्मतका लागि आवश्यक यन्त्र–उपकरण र जनशक्ति प्रभावित क्षेत्रमा पठाउनसमेत सहज भएको उनको भनाइ छ।

अवरुद्ध सडक खुलाउन सडक डिभिजन नुवाकोट, पूर्वाधार विकास कार्यालय र विदुर नगरपालिकाले हेभी उपकरणसहित जनशक्ति परिचालन गरेका थिए।

त्यस क्रममा नेपाली सेना, सशस्त्र प्रहरी बल र नेपाल प्रहरीले समेत आवश्यक सहयोग गरेका थिए।

Originally published on abcnews.com.np.