काठमाडौँ, भदौ १६ गते । लगातारको वर्षासँगै आएको बाढी तथा पहिरोका कारण काठमाडौँ उपत्यका र आसपासका जिल्लाका विभिन्न मुख्य सडकखण्ड अवरुद्ध भएका छन् ।

उपलब्ध विवरणअनुसार ललितपुर, काभ्रे, सिन्धुपाल्चोक, नुवाकोट र धादिङका विभिन्न स्थानमा सडक अवरुद्ध हुँदा यातायात प्रभावित भएको छ ।

ललितपुरको बागमती गाउँपालिका–३ भट्टेडाँडामा पहिरो खसेपछि कान्ति लोकपथ पूर्णरूपमा अवरुद्ध भएको छ ।

काभ्रेको खुकुटे–नेपालथोक–कटुञ्जेबेँसी सडकखण्डमा बाढीको सम्भावित जोखिमका कारण सवारीसाधन सञ्चालनमा रोक लगाइएको छ । रोशी गाउँपालिका क्षेत्रमा बीपी राजमार्गको यातायातसमेत प्रभावित भएको छ ।

सिन्धुपाल्चोकको चौतारा क्षेत्रमा अरनिको राजमार्गअन्तर्गत त्रिपुरासुन्दरी–मेलुङ तथा स्याउबारी सडकखण्ड पूर्णरूपमा अवरुद्ध भएको जनाइएको छ ।

यस्तै, नुवाकोटको शिवपुरी गाउँपालिका–८ शिखरबेँसी र बेलकोटगढी क्षेत्रमा पहिरोका कारण सडक अवरुद्ध भएको छ ।

धादिङको बेनिघाट रोराङ गाउँपालिका–७ कृष्णभीर तथा गजुरी गाउँपालिका–२ घैराभीर क्षेत्रमा पहिरो खसेपछि पृथ्वी लोकमार्ग पूर्णरूपमा बन्द भएको छ ।

सडक अवरुद्ध हुँदा सम्बन्धित क्षेत्रमा सवारी आवागमन प्रभावित भएको छ । वर्षाका कारण थप सडकमा समेत अवरोध हुनसक्ने भएकाले यात्रुहरूलाई सडकको अवस्था बुझेर मात्र यात्रा गर्न र सम्बन्धित निकायबाट जारी हुने सूचनामा ध्यान दिन आग्रह गरिएको छ ।

Originally published on abcnews.com.np.