स्याङ्जा । चापाकोट नगरपालिका–१ का वडाध्यक्ष भुपराज वस्तीमाथि अपरिचित व्यक्तिहरूले मोविल छ्यापेका छन्।

मंगलबार दिउँसो करिब १ बजे वडा कार्यालयमै रहेका वडाध्यक्ष वस्तीमाथि मोविल छ्यापिएको प्रहरीले जनाएको छ।

आर्थिक वर्ष २०८३/८४ को वार्षिक बजेट विनियोजनका क्रममा गाउँ, बस्ती तथा टोल भेला नगरी सार्वजनिक महत्वका विषयमा एकलौटी निर्णय गरी नगर कार्यपालिकामा योजना पेस गरेको आरोप लगाउँदै केही व्यक्तिले वडाध्यक्षमाथि मोविल छ्यापेको प्रारम्भिक जानकारी आएको प्रहरीले जनाएको छ।

घटनालगत्तै प्रहरी टोली वडा कार्यालय पुगेको थियो। स्याङ्जा प्रहरीका सूचना अधिकारी एवं डीएसपी रमेश दत्त अवस्थीका अनुसार घटनामा संलग्न व्यक्तिहरूको पहिचान तथा खोजी भइरहेको छ।

“घटनालगत्तै प्रहरी टोली घटनास्थलमा पुगेको थियो। मोविल छ्याप्ने व्यक्तिहरूको पहिचान तथा खोजतलास भइरहेको छ,” डीएसपी अवस्थीले भने।

घटनाबारे थप अनुसन्धान भइरहेको प्रहरीले जनाएको छ।

बजेट विनियोजन तथा योजना छनोटको प्रक्रियालाई लिएर विवाद उत्पन्न भएपछि वडाध्यक्षमाथि मोविल छ्यापिएको प्रारम्भिक अनुसन्धानबाट खुले पनि घटनामा संलग्न व्यक्तिको पहिचान भने अझै भइसकेको छैन।

Originally published on abcnews.com.np.