काठमाडौं । सरकारले बाढी तथा प्राकृतिक विपद्का कारण ज्यान गुमाएका र पहिचान हुन नसकेका व्यक्तिका शवलाई कानुनअनुसार वैज्ञानिक प्रक्रिया पूरा गरी व्यवस्थापन गरिरहेको जनाएको छ।
सरकारका अनुसार ‘पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३’ बमोजिम पहिचान हुन नसकेका शवको व्यवस्थापन भइरहेको छ।
हालसम्म रसुवामा ६, काठमाडौंमा ४७, चितवनमा २९२, धादिङमा २५, गोरखामा ३९, तनहुँमा १५, नवलपरासी पूर्वमा १७४ र नवलपरासी पश्चिममा ६९ वटा शव व्यवस्थापन गरिएको छ।
सरकारका अनुसार पहिचान हुन नसकेका शवलाई जमिनमुनि व्यवस्थापन गर्ने गरिएको छ। तर शव पहिचान गर्न नसकिने अवस्थामा भेटिए पनि भविष्यमा पहिचान गर्न सकिने सम्भावना कायम राख्न डीएनए तथा अन्य फरेन्सिक पहिचानमा सहयोग पुग्ने आधारहरू सुरक्षित राखेर व्यवस्थापन भइरहेको छ।
हालसम्म बाढी प्रभावित विभिन्न स्थानबाट १ हजार ५० जनाको शव फेला परेको सरकारले जनाएको छ।
शव व्यवस्थापनमा नेपाली सेना, नेपाल प्रहरी तथा सशस्त्र प्रहरी बल, नेपालको सहयोग लिइएको छ।
यसरी गर्न सकिन्छ डीएनए परीक्षण
नेपाल प्रहरीले जारी गरेको सूचनाअनुसार बाढीका कारण मृत्यु भएका व्यक्तिको शव वा शरीरको कुनै अंग तथा भाग फेला परेको अवस्थामा नेपाली तथा विदेशी नागरिकले डीएनए परीक्षणमार्फत पहिचान यकिन गर्न अनुरोध गर्न सक्नेछन्।
प्रहरी निरीक्षक शम्भुबहादुर केसीका अनुसार डीएनए परीक्षणका लागि सबैभन्दा नजिकको रगतको नाता अर्थात् बुबा, आमा, छोरा वा छोरीमध्ये एक जनाको रगतको नमुना आवश्यक पर्नेछ।
रगतको नमुना दिन दुई प्रति पासपोर्ट साइजको फोटोसहित नेपाल प्रहरी अस्पताल महाराजगञ्जको प्याथोलोजी ल्याब, काठमाडौं वा आफूलाई पायक पर्ने नजिकको जिल्ला प्रहरी कार्यालयमा सम्पर्क गर्नुपर्नेछ।
विदेशमा रहेका आफन्तले कसरी नमुना पठाउने ?
विदेशमा रहेका आफन्तका लागि पनि डीएनए परीक्षणको व्यवस्था गरिएको छ।
प्रहरीका अनुसार विदेशमा रहेका बुबा, आमा, छोरा वा छोरीमध्ये एक जनाले सम्बन्धित मुलुकमै डीएनए परीक्षण गराउन सक्नेछन्।
त्यसरी गरिएको डीएनए परीक्षणको विवरण तुलनाका लागि सफ्ट कपी बनाएर नेपाल प्रहरीको आधिकारिक इमेल [email protected] मा पठाउन सकिने व्यवस्था गरिएको छ।
यस प्रक्रियाबाट बाढीमा ज्यान गुमाएका तर तत्काल पहिचान हुन नसकेका व्यक्तिको शव तथा शरीरका अंगको वैज्ञानिक परीक्षणमार्फत पहिचान गर्न सहयोग पुग्ने प्रहरीले जनाएको छ।
Originally published on abcnews.com.np.
प्रतिक्रिया दिनुहोस्