काठमाडौं । प्रधानमन्त्री बालेन्द्र (बालेन) शाहले रसुवाको भोटेकोसीमा आएको भीषण बाढीबारे आफूले घटनाकै दिन बिहान ८ः४५ बजे जानकारी पाएको बताएका छन्।

बुधबार प्रतिनिधिसभा बैठकलाई सम्बोधन गर्दै प्रधानमन्त्री शाहले त्यसबेला आफू संसद्मा उठाइने प्रश्नको जवाफ दिने तयारीमा रहेको बताए।

‘भदौ १० गते बिहान ८ः४५ बजे, जब म यसै सदनमा उभिएर यहाँ उठाइने प्रश्नहरूको जवाफ दिने तयारी गर्दै थिएँ, सूचना आयो– रसुवाको भोटेकोसीमा भीषण बाढी आयो। त्यो खबरसँगै हामी गम्भीर बन्यौँ,’ उनले भने।

बाढीको जानकारी पाएलगत्तै जिल्ला विपद् व्यवस्थापन समितिबाट आवश्यक ब्रिफिङ लिएर सुरक्षा सतर्कता अपनाउन निर्देशन दिएको उनले बताए। घटनाको खबरले आफूलाई प्रभावित क्षेत्रमा रहेका मानिसको सुरक्षाबारे चिन्तित बनाएको पनि उनले उल्लेख गरे।

‘तर मनमा चिसो पस्यो, के हाम्रा मान्छे जोगिन भ्याउनुभयो होला भनेर,’ प्रधानमन्त्री शाहले भने।

उनका अनुसार बिहान ९ बजे सम्बन्धित जिल्ला प्रशासन कार्यालयमार्फत भोटेकोसीको तटीय क्षेत्रका बस्तीका बासिन्दालाई सुरक्षित स्थानमा जान आग्रह गरिएको थियो।

त्यसपछि परिस्थितिको गम्भीरतालाई ध्यानमा राख्दै बिहान ९ः१५ बजे राष्ट्रिय विपद् जोखिम न्यूनीकरण तथा व्यवस्थापन प्राधिकरणको आकस्मिक बैठक बोलाइएको प्रधानमन्त्री शाहले संसद्लाई जानकारी दिए।

बैठकमा बाढी प्रभावित क्षेत्रमा रहेका नागरिकको उद्धार कसरी प्रभावकारी रूपमा अघि बढाउने भन्ने विषयमा निर्णय गरिएको उनले बताए।

Originally published on abcnews.com.np.