काठमाडौं । नेपाल राष्ट्र बैंकले रसुवाको भोटेकोसी–त्रिशूली नदीमा आएको बाढीबाट बैंकिङ कारोबारका आवश्यक कागजात गुमाएका ग्राहकलाई हस्ताक्षर नमुना, फोटो तथा बैंकमा उपलब्ध अन्य विवरणका आधारमा वित्तीय सेवा उपलब्ध गराउन बैंक तथा वित्तीय संस्थालाई निर्देशन दिएको छ।

प्राकृतिक विपद्का कारण चेक, कार्ड, मोबाइल तथा बैंकिङ कारोबारका लागि आवश्यक अन्य कागजात गुमाएका ग्राहकलाई विषम परिस्थितिमा समेत वित्तीय सेवाको पहुँच सुनिश्चित गर्न केन्द्रीय बैंकले यस्तो व्यवस्था गर्न निर्देशन दिएको हो।

नेपाल राष्ट्र बैंकले सूचना जारी गर्दै वाणिज्य बैंक, विकास बैंक, वित्त कम्पनी र लघुवित्त वित्तीय संस्थालाई प्रभावित ग्राहकलाई आवश्यक सहयोग तथा सहजीकरण गर्न भनेको छ।

केन्द्रीय बैंकका अनुसार कागजात गुमाएका ग्राहकको पहिचान संस्थामा सुरक्षित रहेको हस्ताक्षर नमुना, फोटो तथा अन्य विवरणका आधारमा यकिन गरी वित्तीय सेवा उपलब्ध गराउनुपर्नेछ।

प्राकृतिक विपद्का कारण प्रभावित नागरिकलाई बैंकिङ सेवाबाट वञ्चित हुन नदिन यस्तो व्यवस्था गरिएको राष्ट्र बैंकले जनाएको छ।

भोटेकोसी–त्रिशूली नदीमा आएको बाढीका कारण रसुवा, नुवाकोट, धादिङलगायतका जिल्लामा ठूलो जनधनको क्षति भएको छ। बाढी प्रभावित क्षेत्रमा बैंकिङ कारोबारसमेत प्रभावित भएपछि राष्ट्र बैंकले सेवा निरन्तरता र पहुँच सहज बनाउन यस्तो निर्देशन दिएको हो।

Originally published on abcnews.com.np.