काठमाडौं । नेपाल भलिबल लिग (एनभीएल)को फ्रेन्चाइज टोली खप्तड फाल्कोन्सले ब्राजिलका अनुभवी सेटर जो मौरिसियो डा सिल्भा नेटोलाई अनुबन्ध गरेको छ । नेटो खप्तड फाल्कोन्समा आबद्ध हुने तेस्रो विदेशी खेलाडी हुन् । उनको अनुबन्धसँगै खप्तडले विदेशी खेलाडीको कोटा पूरा गरेको छ । खप्तडले यसअघि बेनिनका आउटसाइड हिटर बोस्को डेटे र रुसका आउटसाइड हिटर आर्टेम किसेलेभलाई अनुबन्ध गरिसकेको थियो । नेटोसँग ब्राजिल, इजरायल र इस्टोनियाका क्लबबाट व्यावसायिक भलिबल खेलेको अनुभव छ । खप्तडको मुख्य प्रशिक्षक रुपेशकुमार विष्ट छन् भने धिरोजकाजी बस्नेत मार्की खेलाडीका रूपमा छन् । टोलीले अक्सनबाट सरोज बर्देवा, प्रेमप्रसाद गौतम, विवश थापा, इन्द्र विक, पारस बोहरा, नवराज थापामगर र नवराज धामीलाई अनुबन्ध गरेको थियो । ‘ट्यालेन्ट हन्ट’बाट रोहित रामानन्द जोशीलाई टोलीमा छनोट गरिएको छ । एनभीएलको पहिलो संस्करण शुक्रबार, भदौ १९ गतेदेखि काठमाडौंको त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा सुरु हुँदैछ । खप्तड फाल्कोन्सले शनिबार सगरमाथा स्म्यासर्ससँग खेल्दै प्रतियोगितामा आफ्नो यात्रा सुरु गर्नेछ ।

Originally published on abcnews.com.np.