काठमाडौं । एसीसी प्रिमियर कपको आफ्नो दोस्रो खेलमा बिहीबार चरिपरिचित प्रतिद्वन्द्वी मलेसियाको सामना गर्दा नेपालको लक्ष्य लगतार दोस्रो जित हुनेछ ।

समू्ह ‘ए’अन्तर्गतको यो खेल मलेसियाको यूकेएम यूएसडी ओभलमा नेपाली समयअनुसार बिहान ७:१५ बजे सुरु हुनेछ ।

पहिलो खेलमा बहराइविरुद्ध सात विकेटको जित निकालको नेपाल उच्च मनोबलका साथ मैदान उत्रिनेछ । बहराइनविरुद्ध नेपालका कप्तान सन्दीप लामिछानेले पाँच विकेट लिएका थिए ।

मलेसियाविरुद्ध पनि सन्दीपबाट सोही प्रदर्शनको अपेक्षा गरिएको छ । बहराइनविरुद्ध नेपालको ब्याटिङ केही कमजोर देखिएको थियो । टोलीले यसलाई सुधार गर्नुपर्ने देखिन्छ ।

यता, मलेसिया पनि घरेलु मैदानको फाइदा उठाउँदै लगातार दोस्रो जित निकाल्ने सोचमा छ । पहिलो खेलमा मलेसियाले साउदी अरेबियाविरुद्ध ९३ रनको सहज जित दर्ता गरेको थियो ।

मोहम्मद स्याहदत रमील र वीरनदिप सिंह नेपाली बलरका लागि समस्या बन्न सक्छन् । उनीहरूले पहिलो खेलमा क्रमशः ८२ र ७९ रन बनाएका थिए ।

यसैगरी बलिङमा विजयी उन्नीले घातक बन्न सक्छन् । साउदी अरेबियाविरुद्ध उनले पाँच विकेट हात पारेका थिए ।

प्रतियोगिता अघि मलेसियासँग खेलेका दुवै अभ्यास खेलमा जित निकालेको नेपाललाई केही सहज स्थिति छ । तर, घरेलु टोलीलाई कमजोर आक्ने गल्ती भने नेपालले गर्नु हुँदैन ।

हेड टू हेड

मलेसियाले हालसम्म एकदिवसीय अन्तर्राष्ट्रिय मान्यता प्राप्त नगरेकाले नेपाल र मलेसियाबीच हालसम्म कुनै पनि अन्तर्राष्ट्रिय खेल भएको छैन ।

तर, एकदिवसीय क्रिकेटको इतिहास हर्ने हो भने मलेसियाविरुद्ध नेपाल बलियो देखिन्छ । हालसम्म नेपालले ५० ओभरको खेलमा मलेसियासँग हारको सामना गर्नु परेको छैन ।

एसीसी प्रिमियर कपका हालसम्म भएका दुवै खेलमा नेपाल विजयी भएको छ । नेपालले सन् २०२३ मा ६ र २०२४ मा पाँच विकेटको जित निकालेको थियो ।

यसैगरी नेपालले अभ्यास खेल, आईसीसी क्रिकेट लिग डिभिजन–२ र ४, एसीसी एसिया कप छनोट, एसीसी ट्रफी एलिट, एसिसी प्रिमियर लिगजस्ता प्रतियोगितामा पनि मलेसियाविरुद्ध जित निकालेको छ ।

जारी प्रतियोगिताअघि भएको दुई अभ्यास खेलमा नेपाल क्रमशः ९ विकेट र २७ रनले विजयी भएको थियो ।

नेपालले सन् २०१८ मा भएको एसीसी एसिया कप छनोटमा मलेसियालाई १९ रनले हराएको थियो । सन् २०१२ को आईसीसी विश्व क्रिकेट लिग डिभिजन–२ तथा सन् २०१४ मा डिभिजन–३ अन्तर्गतको खेलमा नेपालले मलेसियालाई क्रमशः १० विकेट र ३६ रनले निरास बनाएको थियो ।

सन् २०१४ को एसीसी प्रिमियर कपमा नेपालले पाँच विकेटको जित निकालेको थियो । यस्तै, नेपालले सन् २०१० र २०१२ एसीसी ट्रफी एलिटको सेमिफाइनलमा पनि मलेसियालाई क्रमशः आठ र २१ रनले हराएको थियो ।

Originally published on abcnews.com.np.