काठमाडौं । जर्मनीका डिफेन्डर एन्टोनियो रुडिगरले अन्तर्राष्ट्रिय फुटबलबाट सन्न्यास लिएका छन् । रुडिगरले मंगलबार १२ वर्ष लामो राष्ट्रिय टोलीको करियर टुंग्याउने घोषणा गरेका हुन् । ३३ वर्षीय रुडिगरले सामाजिक सञ्जालमार्फत सन्न्यासको घोषणा गर्दै नयाँ पुस्ताका खेलाडीका लागि बाटो खुला गर्न चाहेको बताएका छन् । “केही समय बिताएपछि अब विश्राम लिने समय आएको महसुस भयो । म नयाँ पुस्ताका खेलाडीहरूका लागि बाटो खुला गर्न चाहन्छु,” उनले लेखेका छन् । रुडिगरले सन् २०१४ मा जर्मनीको राष्ट्रिय टोलीमा डेब्यु गरेका थिए । उनले राष्ट्रिय टोलीबाट ६६ क्याप जितेका छन् । उनले जर्मनीबाट सन् २०१८, २०२२ र २०२६ गरी तीनवटा विश्वकप खेलेका थिए । स्पेनिस क्लब रियल मड्रिडबाट व्यावसायिक फुटबल खेलिरहेका रुडिगरले यसअघि इंग्लिस क्लब चेल्सीबाट सन् २०२१ मा च्याम्पियन्स लिगको उपाधि जितेका थिए । उनले रियल मड्रिडबाट स्पेनिस ला लिगाको उपाधिसमेत जितेका छन् । अन्तर्राष्ट्रिय फुटबलबाट सन्न्यासलाई करियरको नयाँ अध्यायको सुरुआत भन्दै रुडिगरले अब क्लब फुटबलमा पूर्ण रूपमा केन्द्रित हुने बताएका छन् । उनले इन्स्टाग्राममा लेखेका छन्, “मेरो करियरको नयाँ अध्याय सुरु हुँदैछ, जसमा म मेरो क्लबका लागि पूरा समय खर्चनेछु ।”

Originally published on abcnews.com.np.