काठमाडौं । नेपालका बाढी प्रभावित समुदायका लागि युरोपेली युनियन (ईयू)ले थप ८ करोड ९० लाख रुपैयाँ बराबरको मानवीय सहायता तथा राहत सामग्री उपलब्ध गराउने भएको छ। यससँगै बाढीपहिरोबाट प्रभावित नेपालका लागि ईयूको कुल आपत्कालीन आर्थिक सहायता ४४ करोड ५० लाख रुपैयाँ पुगेको छ। नयाँ सहायता नेपाल रेडक्रस सोसाइटीको नेतृत्वमा सञ्चालित इन्टरनेसनल फेडेरेसन अफ रेडक्रस एन्ड रेड क्रिसेन्ट सोसाइटिज (आईएफआरसी)को विपद् प्रतिकार्य आपत्कालीन कोष (आरईएफ)मार्फत सञ्चालन हुने कार्यक्रमलाई सहयोग गर्न प्रयोग गरिने ईयूले जनाएको छ। नेपालस्थित ईयूको प्रतिनिधिमण्डलका अनुसार अभियानमार्फत वाग्मती प्रदेशका करिब चार हजार घरपरिवारका २० हजारसम्म मानिसलाई आपत्कालीन तथा अस्थायी आवास, नगद सहायता, खानेपानी तथा सरसफाइ, स्वास्थ्य सेवा, मानसिक स्वास्थ्य तथा मनोसामाजिक परामर्श, संरक्षणलगायतका अत्यावश्यक सहयोग उपलब्ध गराउने लक्ष्य राखिएको छ। भदौ १० गते आएको विनाशकारी बाढीका कारण ठूलो जनधनको क्षति भएको तथा घर, पूर्वाधार र अत्यावश्यक सेवामा व्यापक असर परेकाले ईयूले थप सहायता घोषणा गरेको हो। यस्तै, कोपेनहेगेनस्थित ईयूको आपत्कालीन मौज्दातबाट ८० टनभन्दा बढी राहत सामग्री बोकेको उडान यसै साताको उत्तरार्धमा नेपाल आइपुग्ने ईयूले जनाएको छ।

Originally published on abcnews.com.np.