काठमाडौं । उद्योगमन्त्री गौरी यादवले ग्यास आपूर्तिमा देखिएको समस्या समाधानका लागि सरकारसँग सहकार्य गर्न होटल व्यवसायीलाई आग्रह गरेकी छन्। बाढीका कारण पछिल्ला केही दिनदेखि काठमाडौं उपत्यकासहित वाग्मती प्रदेशका अधिकांश जिल्लामा ग्यास आपूर्ति असहज बनेपछि बिहीबार मन्त्रालयमा आयोजित छलफलमा मन्त्री यादवले उपभोक्तालाई पहिलो प्राथमिकतामा राखेर काम गर्न आग्रह गरेकी हुन्। कृष्णभीरमा सडक अवरुद्ध हुँदा ग्यासको आयात तथा ढुवानी प्रभावित भएको भन्दै उनले होटल व्यवसायीलाई आवश्यक ग्यास आफैँ आयात गर्नसमेत आग्रह गरिन्। त्यसका लागि सुरक्षा तथा आवश्यक सहजीकरण गर्न सरकार तयार रहेको उनको भनाइ छ। मन्त्री यादवले होटल व्यवसाय र घरायसी प्रयोजनका लागि छुट्टाछुट्टै सिलिन्डरको व्यवस्था गर्न मन्त्रालय र नेपाल आयल निगमले काम अघि बढाइसकेको जानकारी दिइन्। उनले व्यावसायिक प्रयोजनमा प्रयोग हुने ग्यासको सिलिन्डरको आकार ठूलो बनाउनुपर्ने प्रस्तावसमेत अघि सारेकी छन्। होटल व्यवसाय बन्द गराउने सरकारको कुनै सोच नरहेको स्पष्ट पार्दै मन्त्री यादवले देशको अर्थतन्त्र र पर्यटन क्षेत्र चलायमान बनाउन होटल व्यवसायीको महत्त्वपूर्ण भूमिका रहेको बताइन्। अहिलेको अवस्थामा उपभोक्तालाई पहिलो प्राथमिकतामा राखेर ग्यास आपूर्ति सहज बनाउन सबै पक्षले सहयोग गर्नुपर्ने उनको भनाइ छ। छलफलमा नेपाल आयल निगमका महाप्रबन्धक नागेन्द्र शाहले आयात तथा ढुवानी सहज बनाउन होटल व्यवसायीले समेत आवश्यक सवारीसाधनको व्यवस्था गरी ग्यास ढुवानीमा सहयोग गर्न आग्रह गरे।

Originally published on abcnews.com.np.