काठमाडौं । भोटेकोसी बाढीका कारण चीनतर्फ फसेका ११४ जना नेपाली नागरिक बिहीबार तातोपानी नाका हुँदै स्वदेश फर्किएका छन्। केरुङ क्षेत्रबाट सडकमार्ग हुँदै तातोपानी पुगेका उनीहरूलाई चिनियाँ पक्षले राहदानी नम्बरलगायत विवरणसहित नेपाली अधिकारीको जिम्मा लगाएको हो। स्वदेश फर्किनेमा सिन्धुपाल्चोक, नुवाकोट र रसुवाका नागरिक रहेका छन्। तातोपानी अध्यागमन कार्यालयका प्रमुख पदमराज तिमल्सिनाका अनुसार चीनतर्फ सुरक्षित रहेका नेपाली नागरिकलाई आवश्यक विवरणसहित नेपाली अधिकारीको जिम्मा लगाइएको हो। उनीहरूलाई सम्बन्धित घरसम्म पुर्‍याउन तीनवटा बसको व्यवस्था गरिएको छ। सिन्धुपाल्चोकका प्रमुख जिल्ला अधिकारी शशिधर घिमिरेका अनुसार चिनियाँ पक्षले सुरुमा १४७ जनाको विवरण पठाएको थियो। त्यसमध्ये ११४ जना बिहीबार तातोपानी नाका हुँदै नेपाल भित्रिएका हुन्। उनका अनुसार शुक्रबार थप २०० जना नेपाली स्वदेश फर्किने तयारी छ। रसुवाको भोटेकोसी नदीमा आएको बाढीपछि चीनतर्फ रहेका नेपाली नागरिक प्रभावित भएका थिए। चीनतर्फ सुरक्षित अवस्थामा रहेका नेपालीलाई स्वदेश फर्काउने प्रक्रिया अघि बढाइएको हो।

Originally published on abcnews.com.np.