काठमाडौं । भोटेकोसी–त्रिशूली बाढीका कारण माथिल्लो त्रिशूली–३ ‘ए’ जलविद्युत् आयोजनाको सुरुङभित्र १० दिनसम्म थुनिएपछि जीवित उद्धार गरिएका मेकानिकल फोरम्यान सञ्जय साहले घटनाको दिन सुरुङभित्र करिब ४० देखि ४५ जना रहेको खुलासा गरेका छन्।

उद्धारपछि उपचारका लागि अस्पतालमा भर्ना गरिएका साहले संक्षिप्त प्रतिक्रिया दिँदै आफू कन्ट्रोल रुममा ड्युटीमा रहेको र दुर्घटना भएपछि अन्तिमसम्म सहकर्मीलाई सुरक्षित स्थानतर्फ भाग्न आग्रह गरिरहेकाले आफू बाहिर निस्किन नसकेको बताए।

“म कन्ट्रोल रुममा अपरेटरको काम गर्थें। सामान्यतया त्यहाँ पाँच–छ जना मात्रै हुन्थ्यौं। तर त्यो दिन ४०–४५ जनाजति थियौँ,” उनले भने।

साहका अनुसार दुर्घटनाको संकेत पाएलगत्तै उनले सबैलाई ठूलो बाढी आएको जानकारी गराउँदै तुरुन्त भाग्न भनेका थिए।

“म कन्ट्रोल रुममा भएकाले सबैको ज्यान बचाउनु मेरो जिम्मेवारी थियो। त्यस्तो दुर्घटना भएपछि म एक्लै भाग्न सक्दिनथेँ। सबैलाई बचाउने क्रममा मैले ‘ठूलो एक्सिडेन्ट भयो, ड्यामतिर बाढी आयो’ भनेर सबैलाई भाग्न भनिरहेँ। त्यसै क्रममा मेरो समय गयो र अन्तिममा म आफैँ निस्किन सकिनँ,” उनले सुनाए।

‘पावर हाउसतिर अझै धेरै जना फसेका हुन सक्छन्’

सञ्जय साहले सुरुङको पावर हाउस क्षेत्रभित्र अझै पनि धेरै मानिस फसेको हुन सक्ने आशंका व्यक्त गरेका छन्।

उनका अनुसार सुरुङ निकै लामो भएकाले धेरै कामदारले समयमै बाहिर निस्कने अवसर पाएनन्।

“भाग्न नसकेको होला। टनेल लामो छ। पानीको फोर्सले धेरैलाई भित्रै लगिसकेको होला,” उनले भने।

१० दिनपछि दुई जनाको चमत्कारिक उद्धार

शुक्रबार बिहान नेपाली सेना र सशस्त्र प्रहरी बलको संयुक्त उद्धार टोलीले सुरुङभित्रबाट सञ्जय साह र कबीर महर्जनलाई जीवितै उद्धार गरेको थियो।

दुवै जनालाई हेलिकोप्टरमार्फत काठमाडौं ल्याएर उपचार सुरु गरिएको छ।

सञ्जय साह सप्तरीका स्थायी बासिन्दा हुन् भने कबीर महर्जन काठमाडौंका निवासी तथा आयोजनामा मेकानिकल सुपरभाइजरका रूपमा कार्यरत थिए।

उद्धारपछि बढ्यो आशा

सञ्जय साहको बयानसँगै त्रिशूली–३ ‘ए’ लगायत भोटेकोसी बाढीबाट प्रभावित अन्य जलविद्युत् आयोजनाका सुरुङभित्र अझै मानिस जीवित हुन सक्ने आशा बलियो बनेको छ।

उद्धार टोलीले अहिले पनि सुरुङभित्र खोज तथा उद्धार अभियानलाई निरन्तरता दिइरहेको छ।

Originally published on abcnews.com.np.