दार्चुला । दार्चुलाको अपिहिमाल गाउँपालिका–१ स्थित भट्टारमा पहिरो खस्दा चमेलिया नदी आधा थुनिएको छ ।

शुक्रबार गएको पहिरोले चमेलिया नदीको बहाव आधा अवरुद्ध भएको जिल्ला प्रशासन कार्यालय, दार्चुलाले जनाएको छ । पहिरो जाने क्रम अझै जारी रहेको प्रमुख जिल्ला अधिकारी वर्तराज पौडेलले जानकारी दिएका छन् ।

पहिरो निरन्तर खसिरहेकाले नदी पूरै थुनिन सक्ने जोखिम रहेको प्रशासनले जनाएको छ । त्यसबाट तल्लो तटीय क्षेत्रमा अचानक बाढी आउन सक्ने सम्भावनालाई ध्यानमा राख्दै स्थानीय बासिन्दालाई उच्च सतर्कता अपनाउन आग्रह गरिएको छ ।

जिल्ला प्रशासन कार्यालयले सूचना जारी गर्दै अपिहिमाल–१ भट्टारस्थित चौलानी (चमेलिया) नदीको तटीय क्षेत्रमा बसोबास गर्ने नागरिक तथा सम्बन्धित निकायलाई सम्भावित जोखिमबाट बच्न आवश्यक सावधानी अपनाउन अनुरोध गरेको छ ।

प्रशासनको सूचनामा भनिएको छ, “पहिरोले चौलानी नदी आधा थुनिएको र हाल पहिरो आउने क्रम जारी रहेकाले पूरै थुनिन सक्ने सम्भावना रहेको हुँदा सम्भावित जोखिमबाट बच्न र धनजनको क्षति न्यूनीकरण गर्न उक्त नदीको तटीय क्षेत्रमा बसोबास गर्ने नागरिकहरू, सम्बन्धित निकायहरूमा उच्च सतर्कता अपनाउन जिल्ला प्रशासन कार्यालय हार्दिक अनुरोध गर्दछ ।”

प्रशासनले नदीको अवस्था तथा पहिरोको जोखिमलाई निरन्तर निगरानी गरिरहेको जनाएको छ ।

Originally published on abcnews.com.np.