पोखरा । म्याक्सस नेपालले हालैको बाढीपहिरोबाट प्रभावित समुदायका लागि ८० लाख रुपैयाँ बराबरको आर्थिक तथा राहत सहयोग गरेको छ। एसएआईसी म्याक्सस चीनको सहयोग र हिमालय अर्गनाइजेसनको समन्वयमा कम्पनीले राहत उपलब्ध गराएको हो।

कम्पनीले प्रधानमन्त्री दैवी प्रकोप उद्धार कोषमा ५० लाख रुपैयाँको चेक अर्थमन्त्री स्वर्णीम वाग्लेलाई हस्तान्तरण गरेको छ। बाँकी ३० लाख रुपैयाँ बराबरको सहयोग त्रिशूली नदी पारिका विपद् प्रभावितलाई प्रत्यक्ष रूपमा उपलब्ध गराइएको कम्पनीले जनाएको छ।

नुवाकोटका दुई होल्डिङ सेन्टरमा स्वच्छ खानेपानीका लागि सौर्य ऊर्जाबाट सञ्चालन हुने दुईवटा अल्ट्रा फिल्टर वाटर ट्रिटमेन्ट प्लान्ट जडान गरिएको छ। त्रिशूलीस्थित भैरम माध्यमिक विद्यालयमा जडान गरिएको प्लान्टबाट ३ सय परिवार र विदुर नगरपालिकास्थित त्रिशूली प्राथमिक विद्यालयमा जडान गरिएको प्लान्टबाट २ सय परिवार लाभान्वित हुनेछन्।

प्रत्येक प्लान्टले प्रतिघण्टा १ हजार लिटर पानी शुद्धीकरण गर्न सक्ने कम्पनीले जनाएको छ। आश्रयस्थलमा रहेका परिवारलाई सुरक्षित खानेपानी उपलब्ध गराउनुका साथै विद्यालय पुनः सञ्चालन भएपछि विद्यार्थीलाई समेत यसबाट लाभ पुग्ने अपेक्षा गरिएको छ।

म्याक्सस नेपालले करिब ४ सय जनालाई पुग्ने अत्यावश्यक राहत सामग्रीसमेत वितरण गरेको छ। राहतमा डसना, सिरानी, तन्ना, औषधि, आधारभूत स्वास्थ्य सामग्री, खाद्यान्न, तरकारी, खाना पकाउने भाँडाकुँडा तथा महिला, पुरुष र बालबालिकाका लागि कपडा वितरण गरिएको छ।

राहत वितरणमा हिमालय अर्गनाइजेसनका अध्यक्ष तथा पोखरेली अटो व्यवसायी ध्रुव थापा र प्रबन्ध निर्देशक मिलन थापाको सहभागिता थियो। लायन्स इन्टरनेसनल डिस्ट्रिक्ट ३२५ जे नेपालका चिफ गभर्नर रामराजा थापा लगायत पदाधिकारी पनि राहत वितरणमा सहभागी थिए।

Originally published on abcnews.com.np.