काठमाडौं । रुस–युक्रेन युद्ध अन्त्यका लागि अमेरिकाले कूटनीतिक पहललाई पुनः तीव्र बनाएको छ।

यसैक्रममा अमेरिकी राष्ट्रपति डोनाल्ड ट्रम्पका विशेष दूत स्टिभ विटकफ र जारेड कुसनरले शनिबार मस्कोमा रुसी राष्ट्रपति भ्लादिमिर पुटिनसँग भेटवार्ता गरेका छन्।

क्रेमलिनले सार्वजनिक गरेको फुटेजमा विटकफ र कुसनरले पुटिनलाई अभिवादन गरेको देखिन्छ। भेटका क्रममा पुटिनले वर्तमान परिस्थिति जटिल रहेको उल्लेख गर्दै रुसले युद्ध र पछिल्लो अवस्थाबारे आफ्नो धारणा अमेरिकी प्रतिनिधिमण्डललाई स्पष्ट पार्ने बताएका छन्।

‘वर्तमान अवस्था त्यति सरल छैन। रुसले परिस्थितिलाई कसरी हेर्छ भनेर व्याख्या गर्नेछ,’ पुटिनले भने।

तीन दिन आक्रमण रोक्ने सहमतिका लागि धन्यवाद

वार्ताका क्रममा विटकफले रुस र युक्रेनबीच तीन दिनका लागि एकअर्काको राजधानीमा आक्रमण रोक्ने सहमति बनेको विषयमा पुटिनलाई धन्यवाद दिएका छन्।

यसलाई युद्ध अन्त्यका लागि थप वार्ताको वातावरण निर्माण गर्ने प्रयासका रूपमा हेरिएको छ।

बीबीसीका अनुसार अमेरिकी प्रतिनिधिहरू आइतबार थप वार्ताका लागि युक्रेनको राजधानी किभ जाने तयारीमा छन्।

अमेरिकी राष्ट्रपति ट्रम्पले पनि शुक्रबार विटकफ र कुसनरले युद्ध अन्त्य गर्ने प्रस्ताव लिएर अघि बढिरहेको बताएका थिए।

पुटिन : ‘यस्ता सम्पर्क सधैँ उपयोगी हुन्छन्’

मस्कोस्थित क्रेमलिनमा भएको वार्ताका क्रममा पुटिनले अमेरिकी प्रतिनिधिसँगको सम्पर्कलाई सकारात्मक रूपमा प्रस्तुत गरेका छन्।

‘यस्ता सम्पर्क सधैँ उपयोगी हुन्छन्, परिस्थिति जस्तोसुकै भए पनि,’ पुटिनले भने।

उनले युद्ध अन्त्य तथा शान्ति स्थापनाका लागि प्रयास गरिरहेको भन्दै राष्ट्रपति ट्रम्पलाई धन्यवादसमेत दिएका छन्।

पुटिनले विटकफ र कुसनरसँग काम गर्न आफूहरूलाई सहज रहेको बताएका छन्।

रुसी सरकारी सञ्चारमाध्यमका अनुसार मस्कोको केन्द्रमा रहेको पुटिनको आधिकारिक निवासमा करिब तीन घण्टासम्म बन्द ढोकाभित्र वार्ता भएको थियो।

जेलेन्स्की पनि वार्ताका लागि तयार

यसैबीच युक्रेनी राष्ट्रपति भोलोदिमिर जेलेन्स्कीले पनि अमेरिकी प्रतिनिधिहरूसँग सम्पर्क भएको बताएका छन्।

शनिबार सामाजिक सञ्जालमार्फत जेलेन्स्कीले अमेरिकी राष्ट्रपतिका प्रतिनिधिहरूसँग आफूले कुराकानी गरेको र उनीहरूले रुसी पक्षसँग वार्ता अघि बढाएको जानकारी दिएका छन्।

उनले वार्ता प्रक्रियामा संलग्न सहरहरूमा हवाई आक्रमण रोक्न युक्रेन तयार रहेको संकेतसमेत दिएका छन्।

शान्ति प्रयास फेरि निर्णायक मोडमा ?

रुस–युक्रेन युद्ध अन्त्यका लागि अमेरिका र उसका सहयोगी राष्ट्रहरूले यसअघि पनि विभिन्न चरणमा कूटनीतिक प्रयास गर्दै आएका छन्। तर अहिलेसम्म स्थायी शान्ति सम्झौतामा पुग्न ती प्रयास सफल हुन सकेका छैनन्।

मस्कोमा पुटिनसँग भएको लामो वार्ता र त्यसपछि अमेरिकी प्रतिनिधिहरू किभ जाने तयारीले भने शान्ति प्रयासलाई नयाँ चरणमा प्रवेश गराउने संकेत गरेको छ।

तर युद्धविरामलाई स्थायी राजनीतिक सम्झौतामा परिणत गर्नु अझै जटिल चुनौतीका रूपमा रहेको छ।

अहिलेको कूटनीतिक गतिविधिको मुख्य प्रश्न यही हो—मस्को र किभबीचको युद्धविरामको प्रयास स्थायी शान्ति वार्तातर्फ अघि बढ्छ कि फेरि अर्को असफल प्रयासमै सीमित हुन्छ ?

Originally published on abcnews.com.np.