काठमाडौं । रसुवाको भोटेकोसी नदीमा आएको विनाशकारी बाढीको १२औँ दिन पनि जलविद्युत् आयोजनामा फसेका तथा सम्पर्कविहीन व्यक्तिको खोजी तथा उद्धार प्रयास जारी छ।

नेपाल विद्युत् प्राधिकरणका अनुसार आइतबार रसुवाका २२ मेगावाटको चिलिमे, ३७ मेगावाटको त्रिशूली–३ ‘बी’, १११ मेगावाटको रसुवागढी र २१६ मेगावाटको माथिल्लो त्रिशूली–१ जलविद्युत् आयोजनामा उद्धार तथा खोजी कार्य भइरहेको छ।

चिलिमे जलविद्युत् आयोजनाको कन्ट्रोल रुममा ६ जना फसेको आशंका गरिएको छ। उनीहरूको उद्धारका लागि प्रयास भइरहेको प्राधिकरणका कामु कार्यकारी निर्देशक दीर्घायू कुमार श्रेष्ठले जानकारी दिए।

यस्तै, त्रिशूली–३ ‘बी’ आयोजनामा स्काभेटर प्रयोग गरी खोजी कार्य जारी राखिएको छ। बाढी र पहिरोका कारण पुरिएका संरचनामा सम्भावित जीवित तथा सम्पर्कविहीन व्यक्तिको खोजी भइरहेको जनाइएको छ।

यता, रसुवागढी जलविद्युत् आयोजनामा उद्धार कार्य थप चुनौतीपूर्ण बनेको छ। अन्य आयोजनाको तुलनामा त्यहाँ उद्धार तथा खोजी कार्य अपेक्षाकृत प्रभावकारी रूपमा अघि बढाउन कठिन भइरहेको प्राधिकरणले जनाएको छ।

आयोजनाको कन्ट्रोल रुममा कार्यरत कर्मचारीहरू जीवितै हुन सक्ने आशंकामा खोजी तथा उद्धार कार्यलाई निरन्तरता दिइएको छ।

भोटेकोसीमा आएको बाढीले रसुवाका विभिन्न जलविद्युत् आयोजनामा ठूलो क्षति पुर्‍याएपछि त्यहाँ कार्यरत कर्मचारीको खोजी तथा उद्धारसँगै आयोजनाका संरचनाको क्षतिको मूल्यांकनसमेत भइरहेको छ।

Originally published on abcnews.com.np.