हुम्ला । पहिरो खसेपछि कर्णाली करिडोरअन्तर्गत सिमकोट–हिल्सा सडकखण्डको च्याछरामा यातायात अवरुद्ध भएको छ।

चट्टानी भीरबाट ठूला ढुङ्गासहित पहिरो खसेर सडक अवरुद्ध भएपछि यातायात सेवा पूर्ण रूपमा ठप्प भएको हो। सिमकोटबाट नाँखा गाउँपालिका केन्द्र याल्वाङतर्फ जाने क्रममा सडकको चार स्थानमा पहिरो भेटिएको यात्रुहरूले बताएका छन्।

सडकमा खसेका साना ढुङ्गा यात्रुहरूले मिलेर पन्छाए पनि ठूलो पहिरो हटाउन नसक्दा आवतजावतमा समस्या भएको छ।

च्याछराको चट्टानी भीरबाट ठूला ढुङ्गासहित पहिरो खसेपछि सडक अवरुद्ध भएको बताइएको छ।

पहिरोका कारण मानसरोवर–कैलाश दर्शनका लागि हिल्सातर्फ गइरहेका दुई दर्जनभन्दा बढी पर्यटकसमेत बाटोमै अलपत्र परेका छन्।

सिमकोट–हिल्सा सडक योजनाका प्रमुख वेलबहादुर नेपालीका अनुसार पहिरो पन्छाएर सडक सञ्चालनमा ल्याउने प्रयास भइरहेको छ।

सडक अवरुद्ध भएपछि यात्रु तथा पर्यटकलाई सुरक्षित रूपमा गन्तव्यतर्फ पठाउन समस्या भएको छ।

Originally published on abcnews.com.np.