काठमाडौं । रसुवाको भोटेकोसी नदीमा आएको विनाशकारी बाढीपछि हराएका सुनचाँदी, नगद तथा अन्य धनमाल फेला परेमा आफूसँग नराख्न नेपाल प्रहरीले आग्रह गरेको छ ।

प्रहरीले बाढीका कारण हराएका धनमाल बिक्री वितरण नगर्नसमेत आग्रह गरेको हो ।

“भोटेकोसी बाढीपछि हराएका सुनचाँदी, नगद, धनमाल तथा महत्त्वपूर्ण कागजात फेला परेमा आफूसँग राख्ने, बिक्री वितरण गर्नेजस्ता आपराधिक एवं अमानवीय कार्य नगर्नुहोस्,” प्रहरीले भनेको छ ।

फेला परेको धनमाल तथा महत्त्वपूर्ण कागजात नजिकको प्रहरी कार्यालयमा बुझाएर असल नागरिकको परिचय दिन प्रहरीले आग्रह गरेको छ ।

यही भदौ १० गते आएको हिमबाढीले रसुवा, नुवाकोटलगायत जिल्लामा ठूलो जनधनको क्षति गरेको छ । बाढीका कारण ठूलो संख्यामा मानिस प्रभावित हुनुका साथै घर, व्यवसाय तथा भौतिक संरचनामा समेत क्षति पुगेको छ ।

Originally published on abcnews.com.np.