वीरगन्ज । वीरगन्जस्थित एक क्यासिनोमा नेपालीलाई प्रवेश गराएर जुवा खेलाएको आरोपमा प्रहरीले सखुवाप्रसौनी गाउँपालिकाका अध्यक्ष जसवन्त यादव र प्रहरी निरीक्षक प्रदीप पौडेलसहित ८ जनालाई पक्राउ गरेको छ।

जिल्ला प्रहरी कार्यालय पर्साका अनुसार शनिबार राति करिब साढे १० बजे वीरगन्ज महानगरपालिका–१४, गण्डकस्थित गोल्डेन फिंगर गेमिङ जोन प्रालि (क्यासिनो) मा नेपालीलाई प्रवेश गराई जुवा खेलाइरहेको अवस्थामा उनीहरूलाई नियन्त्रणमा लिइएको हो।

जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) चक्रबहादुर मल्लका अनुसार पक्राउ परेकामाथि अनुसन्धान भइरहेको छ।

अर्का डीएसपी राजु कार्कीका अनुसार गाउँपालिका अध्यक्ष यादव र प्रहरी निरीक्षक पौडेलसहित पक्राउ परेका सबैलाई हिरासतमा राखिएको छ। ‘थप अनुसन्धान गरिरहेका छौँ,’ उनले भने।

पक्राउ पर्नेमा सखुवाप्रसौनी गाउँपालिका–६ का ३० वर्षीय चन्दन सहनी र वीरगन्ज महानगरपालिका–११ का ३९ वर्षीय ओमप्रकाश बैठा पनि छन्।

त्यस्तै, प्रहरीले क्यासिनोका कर्मचारी वीरगन्ज–१४ का २८ वर्षीय विजयकुमार पटेल, वीरगन्ज–२५ का ३१ वर्षीय दिनेशकुमार पटेल, महोत्तरीको पिपरा गाउँपालिका–५ घर भई हाल उक्त क्यासिनोमा कार्यरत ४९ वर्षीय जयदेव साह र वीरगन्ज–१२ का ५० वर्षीय प्रदेशी साहलाई पनि पक्राउ गरेको जनाएको छ।

प्रहरीका अनुसार पक्राउ परेकामाथि घटनाको थप अनुसन्धान भइरहेको छ।

Originally published on abcnews.com.np.