विराटनगर । विराटनगरमा शनिबार निकालिएको ५९औँ ऐतिहासिक राधाकृष्ण रथयात्राका क्रममा उच्छृंखल तथा शङ्कास्पद गतिविधिमा संलग्न भएको आरोपमा प्रहरीले ९० जनालाई नियन्त्रणमा लिएको छ।

रथयात्रामा सहभागी विशाल भीडको मौका छोपेर भक्तजनलाई दुःख दिने, पाकेटमारी गर्ने, बहुमूल्य गहना तथा सामान चोरी गर्ने र अन्य अवाञ्छित गतिविधिमा संलग्न भएको आरोपमा उनीहरूलाई नियन्त्रणमा लिइएको मोरङ प्रहरीले जनाएको छ।

जिल्ला प्रहरी कार्यालय मोरङका एसपी कवित कटवालका अनुसार नियन्त्रणमा लिइएकाहरूलाई वडा प्रहरी कार्यालय तथा जिल्ला प्रहरी कार्यालयको हिरासतमा राखिएको छ।

भीड निगरानी गर्न ड्रोन

रथयात्रामा ठूलो संख्यामा भक्तजन सहभागी हुने भएकाले प्रहरीले सुरक्षा व्यवस्थालाई विशेष प्राथमिकता दिएको थियो।

भीडको निगरानी तथा सम्भावित जोखिमको वस्तुस्थिति बुझ्न प्रहरीले ड्रोनमार्फत निगरानी गरेको थियो। रथयात्राको मार्ग तथा भीडभाड हुने स्थानमा सुरक्षाकर्मीको उपस्थिति बाक्लो बनाइएको थियो।

सादा पोसाकमा पनि प्रहरी परिचालन

भीडभाडको मौका छोपेर हुन सक्ने चोरी, पाकेटमारी तथा झैझगडाजस्ता आपराधिक गतिविधि नियन्त्रण गर्न सादा पोसाकका प्रहरीसमेत परिचालन गरिएको थियो।

प्रहरीले रथयात्राका क्रममा शङ्कास्पद गतिविधि गर्ने तथा भक्तजनको सुरक्षामा असर पार्न सक्ने व्यक्तिमाथि निगरानी बढाएको थियो।

हरेक वर्ष विराटनगरमा आयोजना हुने राधाकृष्ण रथयात्रामा ठूलो संख्यामा भक्तजन तथा दर्शक सहभागी हुने भएकाले यसपटक पनि सम्भावित आपराधिक गतिविधि रोक्न सुरक्षा संयन्त्रलाई थप सक्रिय बनाइएको प्रहरीले जनाएको छ।

Originally published on abcnews.com.np.